Bajrami dorëzon projektin për Gjykatën Kushtetuese

Prishtinë - Ministri i Ministrisë së Shërbimeve Publike, Arsim Bajrami, i cili ka udhëhequr punën e Grupit Punues për themelimin e Gjykatës Kushtetuese, ka takuar, në një takim të veçantë, kryetarin e Kuvendit të Kosovës, Jakup Krasniqi. Ministri Bajrami i ka dorëzuar kryeparlamentarit Krasniqi, pakon për themelimin e Gjykatës Kushtetuese dhe e ka njoftuar për veprimet konkrete, të cilat duhet t'i ndërmarrin institucionet e Republikës së Kosovës, për funksionalizimin e Gjykatës Kushtetuese të Kosovës, në pajtueshmëri me legjislacionin në fuqi.

Të premten, më 16 janar 2009, në ish - objektin e Zonës së Pestë të TMK-së, Ministria e Shërbimeve Publike do të bëjë përurimin e Zyrës administrative të Gjykatës Kushtetuese, zyrtarët administrativë të së cilës, fillimisht, do të jenë në funksion të pranimit të kërkesave kushtetuese, përderisa Gjykata të bëhet plotësisht funksionale.