"Banda e Durrësit", Lul Berisha, Dokle e Indrit Taullaj rebelohen për avokatët
TIRANE - Tre eksponentët kryesorë të "Bandës së Durrësit", Lulzim Berisha, Endrit Dokle dhe Indrit Taullai do të kenë mbrojtës të tjerë ligjorë në seancat e ardhshme gjyqësore. Vendimi për avokatët e rinj u mor nga Gjykata për Krimet e Rënda, në seancën e djeshme në ngarkim të anëtarëve të kësaj bande. Avokatët e caktuar dje do të zëvendësojnë mbrojtësit, të cilët u përjashtuan nga ana e gjykatës javën e kaluar për braktisje të sallës së gjyqit. Ndërkohë që në seancën, e cila dështoi për shkak të mungesës së disa prej avokatëve, nuk kanë munguar debatet e të pandehurve me trupin gjykues. Të pandehurit kanë shprehur habi për faktin që gjykata një ditë më parë u kishte dërguar një deklaratë ku i njoftonte me shkarkimin e mbrojtësve të tyre, ndërsa dje po u kërkonte sërish nëse donin mbrojtjen e tyre. "Nuk po e marrim vesh këtë punë. Dje më erdhi një deklaratë që avokati im është përjashtuar, sot na pyesni a i pranojmë si mbrojtës. Si të doni. Vazhdoni. Çfarë të doni bëni. Vallai s'po marrim vesh gjë", ka pohuar i pandehuri Indrit Taullai, duke iu drejtuar trupit gjykues. Jo më pak i irrituar ka qenë edhe Lulzim Berisha në këtë pikë, ndërsa më "paqësori" ka qenë Endrit Dokle, i cili pranoi duke ironizuar se "Mos janë më të mirë këta". Në vijim gjykata ligjëroi tre avokatët e rinj si mbrojtës të Berishës, Dokles dhe Taullait dhe mbylli seancën. Ndërprerja e djeshme ka shënuar të disatën herë, që shkak për shtyrjen e seancave të këtij procesi bëhet mungesa e avokatëve në sallën e gjyqit. Të 17 anëtarët e "Bandës së Durrësit" akuzohen nga prokuroria për një numër të madh veprash të rënda penale. Sipas kërkesës për gjykim të Prokurorisë për Krimet e Rënda, në fillimet e saj organizata kriminale pretendohet se drejtohej nga i pandehuri Lulzim Berisha. Me kalimin e kohës banda u përfshi në konflikte të shkaktuara prej krijimit të dy grupeve brenda saj. Konflikte këto, që janë pasuar me episode kriminale përfshi vrasje, plagosje dhe atentate. ar.ba