Basha, takim me kryekomunarin e Mitrovicës

>Ministri i Punëve të Jashtme, z. Lulzim Basha, priti dje  në një takim të veçantë z. Bajram Rexhepi, Kryetar i Komunës së Mitrovicës dhe ish-Kryeministër i Kosovës. Gjatë takimit, biseda u përqendrua në zhvillimet më të fundit në Kosovë, veçanërisht pas fillimit të funksionalizimit të EULEX-it në të gjithë territorin e vendit, me theks të veçantë  situata në veri të Mitrovicës. Ministri Basha, vlerësoi menaxhimin e situatës së tensionuar të sigurisë të krijuar në Mitrovicë gjatë ditëve të para të janarit nga autoritetet e Kosovës, EULEX-i dhe KFOR-i. Ai theksoi nevojën e funksionalizimit të plotë të EULEX-it dhe reagimin e menjëhershëm të tij në bashkëpunim me KFOR-in dhe organet e tjera të rendit të Kosovës, për të shmangur çdo lloj dhune që do të kërcënonte situatën e sigurisë  dhe rrezikonte jetën dhe pronën e qytetarëve të saj.
Ministri Basha theksoi se vendosja e kontrollit të plotë të autoriteteve të Kosovës në veri të Mitrovicës, përfshirë pikat e kontrollit doganor në kufirin me Serbinë përbëjnë një domosdoshmëri për funksionimin e shtetit ligjor në të gjithë Kosovën.
Kjo do ti presë rrugën veprimit të elementëve ekstremistë, kriminalitetit dhe kontrabandës, dhe do ti kontribuojë forcimit të paqes, stabilitetit dhe zhvillimit ekonomik të Kosovës. Z. Rexhepi falenderoi Ministrin Basha për ndihmën dhe mbështetjen e fuqishme të Shqipërisë për Kosovën në konsolidimin e shtetit të pavarur e sovran, si dhe të njohjes së saj ndërkombëtare.