Bashkia u kërkon borxhet 200 bizneseve

Qindra subjekte që ushtrojnë veprimtari biznesi në territorin administrativ të Bashkisë së Sarandës janë evidentuar si borxhlinj që prej vitit 2008 në Drejtorinë e Tatim-Taksave të qeverisjes vendore, për shuma të konsiderueshme. Ata rrezikojnë sanksione, në se nuk shlyejnë detyrimet e prapambetura deri në fundin e marsit. Lefter Thomai, drejtor i Zyrës së Tatim-Taksave në Bashkinë e Sarandës, tha se po punohet pa ndërprerje për vjeljen e këtyre detyrimeve. Detyrimet e pamjela për llogari të vitit 2008, kapin një shumë prej 10 milionë lekësh. Të njëjtat burime thanë se me këto biznese është komunikuar vazhdimisht dhe se Drejtoria e Tatim-Taksave në bashki gjendet në prag të mbledhjes me forcë të detyrimeve. Drejtori Thomai tha se nuk ka vend për të shpresuar në një falje të këtyre detyrimeve.