Bashkitë, 30% e buxhetit të kulturës,për teatrin

Një tentativë për të shpëtuar nga rrënimi i plotë teatrot e rretheve. Rreth 30% e buxhetit për kulturën, që do të marrë çdo bashki, do t’u shkojë teatrove. Duke parë gjendjen në të cilën ndodhen teatrot lokalë, grupi i punës, që po merret me shqyrtimin dhe plotësimin e Ligjit për “Artin Skenik”, i cili do të quhet Ligji “Për Artin” ka propozuar ta shtojë një pikë të tillë në ligj. Këtë e bëri të njohur ministri i Turizmit, Kulturës, Rinisë dhe Sporteve, Ferdinand Xhaferaj, gjatë një konference mbi ndryshimet në ligjin e shumëpërfolur. “Duke marrë shkas nga një gjendje jo shumë e kënaqshme nga institucionet e pushtetit vendor, në këtë ligj është parashikuar që për institucionet e teatrove në rrethe me më shumë se 50 vjet veprimtari, 30 % nga granti i bashkive për kulturën të kalojë te këto institucione”. Gjatë konferencës së djeshme u diskutuan edhe të tjera probleme, lidhur me këtë ligj. U bë e njohur përfshirja brenda tij edhe e dy institucioneve kulturore, përkatësisht Cirku Kombëtar dhe ai i Estradës, nën emërtesën Teatri Kombëtar i Komedisë. U diskutua gjithashtu krijimi i Qendrës Kombëtare të Artit, mënyra e emërimit të drejtuesit të saj si dhe funksionimit të kësaj qendre, ekzistenca e një bordi, apo i më shumë bordeve pranë kësaj qendre, e cila do t’ia shkarkojë MTKRS-së barrën e ndarjes së buxheteve. Merrnin pjesë në këtë konferencë-debat përfaqësues institucionesh, shoqata artistike, sindikata si dhe artistë të fushave të ndryshme. Shumica e të pranishmëve ishin dakord me ndryshimet paraprake të bëra në ligj dhe te-tuk pati edhe ndonjë vërejtje, apo sugjerim për të sqaruar më tej disa pika ende të “errëta”, si psh. atë të sponsorizimit të projekteve artistike.