Berisha : SHBA s‘na kërkoi vendosje raketash në Shqipëri

Kryeministri Berisha i ka dhënë përgjigje dje dilemës nëse Shqipëria do të transformohet apo jo në një bazë raketash që mund të përdoren nga Shtetet e Bashkuara të Amerikës. "Qeveria e SHBA nuk ka paraqitur asnjë kërkesë për vendosje raketash, por për të qenë i qartë, Shqipëria, si anëtare e ardhshme e NATO-s, do të përmbushë çdo detyrim të kërkuar dhe do të shqyrtojë çdo kërkesë të SHBA që punon për paqen në botë. Por theksoj se deri tani nuk ka asnjë kërkesë", u shpreh Berisha. Deklaratat e Kryeministrit u bënë në selinë e qeverisë, në një konferencë të posaçme për shtyp, ku kreu i ekzekutivit përshëndeti mbylljen përfundimtare të ratifikimit të protokollit të Shqipërisë në NATO. Ratifikimi i protokollit të NATO-s nga 27 vendet anëtare të Aleancës së Atlantikut të Veriut cilësohet si një moment historik për Shqipërinë nga Kryeministri Berisha. Sipas tij, ratifikimi i protokollit u bë në kohë rekord. "Në programin tim elektoral, unë u sigurova shqiptarëve ftesën për në NATO, por jo finalizimin e procesit, por ne shumë shpejt jemi anëtarë me të drejta të plota në NATO", u shpreh Berisha. Kryeministri vlerësoi kontributin e ish-presidentit të SHBA-së, Xhorxh Bush, që Shqipëria tashmë renditet në radhët e 27 vendeve anëtare të Aleancës së Atlantikut të Veriut. "Kjo është shkalla e mëtejshme e përgjegjësisë për të thelluar më tej reformat dhe për të përmbushur me dinjitet detyrimet që rrjedhin nga reformat", tha Berisha, duke shtuar se "ata që e nisën rrugën për në NATO, ata e sosën, por nuk mund të mos theksoj ndryshimet e thella". Shefi i qeverisë pranoi se po të mos ishte rebelimi i vitit 1997, Shqipëria do të kishte festuar vite më parë hyrjen në NATO. "Nëse në vitet ‘90 ishte vetëm PD dhe opozita, në vitin e fundit, përveç dy personave, Majkos dhe Metës, pala tjetër bënte rezoluta kundër hyrjes në NATO. Por shtoj se PS mori një qëndrim pro anëtarësisë", shtoi ai.