Rama: Do t‘u japim fund zonave informale

Kreu i socialistëve, Edi Rama, u ndal dje në Kamëz, në kuadër të turit të tij "Vullnetarët e Bashkimit të Ri për Ndryshim". Rama premtoi në këtë takim se me fitoren në zgjedhjet e 28 qershorit, të gjithë banorët e zonave përreth qyteteve të mëdha, do të marrin një tapi me vlerë për pasuritë e tyre të paluajtshme. "Unë jam këtu për t‘i parë në sy përmes jush të gjithë të ardhurit që kanë ndërtuar themelet e së ardhmes të familjeve të tyre në shtëpitë pa leje rreth Tiranës dhe rreth të gjitha qyteteve të mëdha të vendit", u shpreh Rama. Për t‘ju thënë, vijoi ai, se me fitoren e 28 qershorit, do të marrë fund edhe pritja juaj. "Qeveria jonë e bashkimit të ri, pa dallim feje, krahine dhe ideje, do ta përfundojë legalizimin, jo duke u dhënë në dorë një Shaban-tapi, pa asnjë vlerë, por duke ju kthyer pasuritë tuaja të paluajtshme, duke e kthyer në pasurinë tuaj të paluajtshme, shtëpitë, që politikanët për interesa elektorale, ua mbajnë peng tash 10 vjet", premtoi Rama. Për liderin e opozitës, me fitoren e 28 qershorit, do të fillojë edhe fundi i kaosit në hapësirat informale, ku PS do të investojë fuqimisht si asnjëherë më parë në të gjithë këto vite për kanalizime, rrugë, ndriçim, çerdhe, kopshte dhe shkolla.