Berisha, Mantica: Italia, e angazhuar për Ballkanin në BE

Italia përkrah zgjerimin e BE-së edhe me vendet e Ballkanit. Kryeministri Berisha takon zëvendësministrin e Punëve të Jashtme të Republikës Italiane, Senatorin Alfredo Mantica. Zëvendësministri i Punëve të Jashtme të Republikës Italiane, senatori Alfredo Mantica, i përcolli Kryeministrit Berisha përshëndetjet e Kryeministrit italian Silvio Berlusconi si dhe ministrit të Punëve të Jashtme të Italisë, z.Franco Frattini, si dhe i shprehu edhe një herë kënaqësinë për marrjen e ftesës dhe nënshkrimin e Protokollit të Anëtarësimit në NATO. Biseda u përqendrua në procesin e zgjerimit të BE-së pas Referendumit të Irlandës, lidhur me të cilin senatori Alfredo Mantica theksoi se pavarësisht zhvillimeve të fundit në Irlandë, qeveria italiane do të mbështesë fuqimisht integrimin e Shqipërisë dhe mbarë vendeve të Ballkanit Perëndimor në BE dhe se ky integrim është në interesin e ndërsjellë të Ballkanit dhe Evropës. Lidhur me këtë ai shtoi se Italia do të angazhohet që Ballkani, rajon i cili është pjesë e Evropës, t’i kthehet kontinentit të cilit i përket. Kryeministri Berisha shtoi mbi këtë çështje se 94% e shqiptarëve janë pro Shqipërisë në BE dhe se e gjithë kjo energji pozitive e tyre si dhe e popujve të tjerë të rajonit duhet të shkojë në shërbim të progresit dhe modernizimit të demokracive në këto vende dhe sigurisht të mos dekurajohet nga një përjashtim.