Berisha sot në Itali me ftesë të Berlusconit

Kryeministri Sali Berisha niset sot për një vizitë zyrtare në Itali me ftesë të Kryeministrit të Italisë, zotit Silvio Berlusconi. Në ditën e parë të kësaj vizite, Kryeministri Berisha do të jetë i ftuar i nderit në Forumin Ekonomik “Italy and South Eastern Investment Forum” i cili zhvillohet në Verona, aktivitet në të cilin Kryeministri Berisha do të mbajë një fjalë përshëndetëse dhe gjatë të cilit do të takohet me ministrin e Ekonomisë të Italisë, zotin Scaiola si dhe me përfaqësues të grupeve të biznesit, pjesëmarrëse në këtë forum. Në ditën e dytë të vizitës së tij në Itali, Kryeministri Berisha do të zhvillojë një takim me Presidentin e Dhomës së Deputetëve të Italisë, zotin Gianfranco Fini në pallatin “Montecitorio” dhe më pas do t’i drejtohet pallatit “Chigi”, ku do të zhvillohet ceremonia zyrtare dhe takimi me Kryeministrin e Italisë, zotin Silvio Berlusconi. Gjatë këtij takimi do të nënshkruhet nga dy homologët dhe Dokumenti i Partneritetit Strategjik. Në fund të vizitës së tij zyrtare në Itali, Kryeministri Berisha do të pritet në takim në Campidoglio nga kryetari i Bashkisë së Romës, zoti Gianni Alemano.