Berisha takon sipërmarrësit shqiptaro-amerikan: Bashkim kombit

Kryeministri Sali Berisha u premton shqiptarëve në mbarë botën se përgjatë 4 viteve që vijnë, “do të shërojmë të gjitha plagët e një ndarjeje të pajustifikueshme një shekullore të kombit”. Z. Berisha ishte i ftuar në ceremoninë tradicionale të përvitshme, të organizuar nga Këshilli Kombëtar Shqiptaro-Amerikan, në Nju Jork. Në këtë mbrëmje, Këshilli Kombëtar Shqiptaro-Amerikan nderoi me çmime dy personalitete: negociatorin që luajti një rol kyç në finalizimin e procesit të pavarësisë së Kosovës, z. Marti Ahtisari dhe fotografin Fadil Berisha, i cili ka zgjedhur rrugën e artit për të bërë të njohura në botë vlerat shqiptare. Ky është një ritual i përvitshëm, ku shqiptaro-amerikanët nderojnë me çmime disa nga personalitetet më të njohura në botë që japin kontribut për çështjet e tyre. Ish-kryenegociatori Ahtisari, njeriu i dalluar për mjeshtërinë diplomatike në kapërcimin e vështirësive dhe pengesave me të cilat përballej pavarësia mori çmimin “Duart e Shpresës”, çmim që iu dorëzua në mënyrë simbolike nga Presidenti i Kosovës, z. Fatmir Sejdiu. Z. Berisha, i cili mbajti më pas një fjalim të gjatë, foli për vështirësitë e mëdha që u desh të kapërcehen për arritjen e pavarësisë së Kosovës. Kryeministri falënderoi me mirënjohje Presidentin Ahtisari dhe ambasadorin Wisner për kontributin e tyre në pavarësinë e Kosovës. “Mbasi latë Presidencën tuaj, ju u bëtë një lider i vërtetë i botës. Në gjykimin tim modest, negociatori më i madh i 20 viteve të fundit. Kontributi juaj në paqen e botës u shpërblye me çmimin më fisnik: çmimin “Nobel”. Doja t’ju siguroja se në zemrën e kombit tim, në kujtesën e kombit tim ju do të mbeteni përgjithmonë si një prej themeluesve të pavarësisë të Kosovës”.

“Në katër vite, - vijoi Kryeministri, - do të shërojmë të gjitha plagët e një ndarjeje të pajustifikueshme një shekullore të kombit. Ne ndërtuam një rrugë të re, do të ndërtojmë rrugë të tjera. Kombi do të ketë dy qeveri, dy administrata, sepse pavarësia e Kosovës është interesi jetësor i çdo shqiptari. Por, kombi do të ngelet një, ashtu siç ishte në kohët e vjetra. Gjithmonë do të jetë një komb, falë sakrificave tona, falë miqve tanë, falë Zotit. Ne jemi një komb i lirë tani dhe do ta ndërtojmë të ardhmen tonë si një vend i lirë”. Duke vlerësuar se pas pavarësisë së vendit, anëtarësimi i Shqipërisë në NATO ishte arritja më e madhe, Kryeministri Berisha theksoi: “Ne po punojmë në një projekt madhor, atë të integrimit evropian, i cili është projekt shumë i vështirë dhe serioz, por unë jam shumë optimist se ne do të arrijmë të implementojmë çdo ditë, standarde dhe praktika që janë të përbashkëta me kombet evropiane”.