Biberaj: Një anëtar- një votë, shprehje e demokracisë direkte në PD

Deputeti dhe anëtari i Kryesisë së Partisë Demokratike, Aleksandër Biberaj ngre si të domosdoshme çështjen e zgjedhjes së një lidershipi të ri në degën e Partisë Demokratike në Tiranë, nëpërmjet parimit një anëtar një votë. Sipas tij parimi një anëtar një votë është parimi më demokratik, i cili aplikohet si nga Partia Republikane dhe ajo Demokratike në SHBA, por edhe nga të gjitha Partitë Popullore Europiane. Këtë propozim, deputeti Biberaj e ka bërë në radhë të parë duke u nisur jo vetëm nga rëndësia që ka Tirana, por sipas tij edhe me qëllim që të fillojë aplikimi i këtij parimi demokratik, si dhe të implementohet një konkurrencë reale ndërmjet kandidatëve, me qëllim fitoren e më të mirit. Gjatë prononcimit për mediat ai thekson ndër të tjera domosdoshmërinë e përshpejtimit të fushatës së zgjedhjeve të reja partiake në Tiranë, si dhe në degët e tjera të papërfunduara, me qëllim përgatitjen e Kuvendit Kombëtar të PD-së, por edhe përgatitjen e për zgjedhjet e 28 Qershorit. Sipas tij lidershipi i ri duhet të jetë me autoritet dhe personalitet, me kontribute në PD, si dhe përfaqësues të interesave të demokratëve tiranas, me qëllim që Tirana të garantojë fitoren në zgjedhjet e 28 Qershorit. Tirana, duke qenë kryeqytet, por edhe duke pasur 32 deputetë në Parlamentin e ardhshëm, ka një rëndësi të jashtëzakonshme, pasi përcakton fituesin e zgjedhjeve të 28 qershorit, pra edhe qeverisjen e ardhshme, ka theksuar ai. Aplikimi i këtij qëllimi, sipas deputetit Biberaj do të gjallëronte strukturat e PD-së Tiranë, pasi demokratët e Tiranës do të ndjeheshin të respektuar dhe të motivuar nëpërmjet votimit direkt për lidershipin e tyre, shprehje kjo e demokracisë direkte në  parti. Aplikimi i këtij parimi do të rriste ndjeshëm demokracinë dhe transparencën brenda partisë, do të çlironte shumë energji pozitive, si dhe do të krijonte një klimë bashkëpunimi dhe uniteti, gjë kjo tepër e domosdoshme në prag fushate elektorale, ka theksuar Biberaj. Gjithashtu, gjatë një interviste deputeti Biberaj ka shprehur mendimin e tij se duhet të fillohet me përgatitjet për Kuvendin Kombëtar të PD-së, i cili sipas tij zgjedh edhe organet e reja drejtuese, shpalos platformën elektorale dhe përgatit partinë për zgjedhjet e 28 Qershorit. Kongresi siguron gjithashtu edhe rinovim dhe rrotacion të elitës politike të PD-së, aq i nevojshëm dhe i domosdoshëm për të fituar zgjedhjet e 28 qershorit, pasi një pjesë e elitës politike është konsumuar në mënyrë të pariparueshme, ka theksuar ai ku ndër të tjera ka shtuar se duhet që strukturat e PD-së nga qendra në bazë, të cilat janë në një gjumë të thellë letargjik të zgjohen, dinamizohen, motivohen, dhe orientohen për fitore pasi koha po kalon.