Bie Skenderbeu Teuta ne krye

Java e 22-të e Superligës sjell rokadën në kreun e klasifikimit. Skënderbeu është mposhtur 1-0 në fushën e Flamurtarit, duke humbur kryesimin. Sfida në Vlorë është vendosur nga një gol i sulmuesit Pero Pejiç në minutën e tretë të takimit, ndërsa kjo ka bërë që korçarët të pësojnë humbjen e parë pas gjashtë fitoreve radhazi në trasfertë. 

Gjithashtu, fusha e Flamurtarit mbetet një tabu për ujqërit e dëborës, që nuk marrin pikët e plota në qytetin bregdetar prej 36 vjetësh dhe për ta ndryshuar këtë trend negativ duhet të presin minimalisht sezonin e ardhshëm. Në anën tjetër, vlonjatët e Shkëlqim Muçës konsolidojnë pozitat në vendin e katërt.

Nga hapi fals i Skënderbeut ka përfituar Teuta, që mposhti pa vështirësi 2-1 Shkumbinin dhe tashmë merr kreun e Superligës, me 49 pikë, dy më shumë se kampionët në fuqi. Durrsakët i fallen dy golave të 21-vjeçarit Ansi Nika në fraksionin e parë të lojës, ndërsa rrjeta e Roland Dervishit për peqinasit nuk ia prishi festën skuadrës së Hasan Likës. 

Pikët e plota i merr edhe Tirana, që ngjitet në kuotën e 46 pikëve, vetëm një më pak se Skënderbeu. Edhe pse në letër sfida e bardhebluve me Tomorin dukej thjesht një formalitet, gjërat në fushën e lojës kanë rrjedhur ndyshe.

Për fitoren e Tiranës u nevijot një gol i Bekim Balës në minutën e parë shtesë të takimit, ndërsa skuadrat e mbyllën takimin me nga 10 lojtarë, pas kartonëve të kuq të Pishës dhe Ofoje, që debatuan ashpër në fushë. 

Në takimet e tjera të javës së 22-të, Kamza fitoi 3-1 në shtëpi me Laçin dhe falë rrjetave të Manukës, Karapicit e Tepshit merr tri pikë shumë të rëndësishme në luftën për mbijetesë, ndërsa takimi Pogradeci-Bylis përfundoi në barazim 1-1.