Bizhga kërcënon Gjermenin

29/05/2005  Ende pa filluar zyrtarisht hapja e fushatës elektorale për zgjedhjet parlamentare të korrikut, në Durrës, është regjistruar incidenti i parë mes kampit të majtë. Dje, në mbrëmje, në një konferencë për shtyp kryetari i Lëvizjes Socialiste për Integrim, Ligor Petro dhe kandidati i kësaj partie, në zonën nr.28, Leonidha Gjermeni, kanë akuzuar deputetin Bizhga, për presion dhe kërcënim ndaj shtabit të tyre elektoral. Sipas Gjermenit, Bizhga ka vënë në përdorim strukturat e policisë ndërtimore për të ushtruar presion ndaj një shtetasi, i cili i kishte liruar njërin kat të banesës së tij, kundrejt qirasë, kandidatit të LSI, që do të konkurrojë përballë Bizhgës. Shtabi i Gjermenit është vendosur vetëm 50 m larg shtabit të Bizhgës në lagjen nr.17, pranë Ndërmarrjes së Ujësjellës-Kanalizimit dhe pas marrëveshjes me shtetasin Adem Barçi, LSI e ka vendosur në zyrën e shtabit flamuj, pankarta, postera elektorale dhe portrete të kandidatit, si brenda edhe jashtë godinës. Në protestën e tyre, drejtuesit e LSI së Durrësit, kanë thënë se xhelozia e Bizhgës e ka shtyrë këtë të fundit të ushtrojë presion te policia ndërtimore e Durrësit. Nga ana tjetër, deputeti Gazmir Bizhga, i cili është edhe kryetar i PS Durrës, nuk ka pranuar të komentojë denoncimin publik të Gjermenit. “Nuk kam asgjë për të thënë, pasi Gjermeni është mësuar të akuzojë”, ka pohuar kandidati Bizhga.