Bode: Ekonomia shqiptare e stabilizuar, të dhënat e muajve të parë të 2010-s drejt përmirësimit

Ministri i Financave Ridvan Bode u shpreh sot gjatë një konference për shtyp se ekonomia shqiptare po kthehet drejt normalitetit. Presionet e krizës globale, tha ministri Bode, po i përkasin të shkuarës tashmë. Sipas ministrit Bode, të dhënat ekonomike të muajit mars janë optimiste dhe po shkojnë drejt përmirësimit. Stabiliteti ekonomik i vendit, u theksua dje edhe nga INSTAT. Sipas të dhënave në Shkurt 2010 u eksportuan 11,3 miliardë lekë mallra, me rritje 18.1 përqind në krahasim me Janar 2010 dhe rritje me 50.5 përqind në krahasim me Shkurt 2009. Gjatë kësaj periudhe u importuan 32 miliardë lekë mallra me rritje 6.2 përqind në krahasim me Janar 2010 dhe ulje 4.2 përqind në krahasim me Shkurt 2009. Defiçiti tregtar i këtij muaji është 20,7 miliardë lekë, duke shënuar një rritje prej 0.7 përqind, krahasuar me muajin paraardhës dhe një ulje prej 20 përqind krahasuar me Shkurt 2009.