Bogdani, dopietë si paralajmërim për Juven

Erjon Bogdani vazhdon të demonstrojë formën e tij të mirë në këtë prag sezoni. Sulmuesi shtatlartë i Kombëtares shqiptare është shndërruar në protagonist në ndeshjen miqësore që skuadra e tij, Kievo, ka luajtur kundër amatorëve të Sant‘Anna d‘Alfaedo. Ai ishte autor i një dopiete në këtë sfidë, e cila është mbyllur me rezultatin e thellë 12-0. Ndërkohë, nga një tregolësh kanë shënuar dy sulmuesit e tjerë, Pelisier dhe Granoke. Për transfertën shumë të rëndësishme të Torinos, ku kundër Juventusit të dielën Kievo do të luajë edhe ndeshjen e parë sezonale, trajneri Di Karlo është i orientuar t‘i japë besim skuadrës së fundit të sezonit të kaluar. Kështu që Bogdani parashikohet titullar përkrah Pelisierit në sulm, ndërsa Granoke mund ta fillojë ndeshjen nga stoli i rezervave. Kjo ndeshje do të jetë shumë e rëndësishme për sulmuesin shqiptar, edhe për një arsye speciale. Në tribunën e stadiumit "Delle Alpi", do të jetë i ulur trajneri i Kombëtares shqiptare, Josip Kuzhe, i cili e ka marrë rrugën për në Torino, për të ndjekur nga afër Bogdanin në përballjen ndaj Juventusit. Prandaj, ai shpreson të bëjë një paraqitje të mirë nesër.