Bora banoret thirrje per ndihme

6 persona të izoluar nga bora në zonat e Bulqizës dhe Dibrës janë në gjendje të rëndë shëndetësore dhe bëjnë thirrje për ndihmë. Në fshatin Preç të Lurës, dy fëmijë janë të sëmurë rëndë. Një grua shtatëzënë në fshatin Nezaj të Zalldardhës ka nevojë për transport urgjent në spital. Gjithashtu një tjetër shtatëzënë nga Selishta ka nevojë për kujdes mjekësor. Në gjendje të vështirë shëndetësore gjenden edhe dy gra të tjera shtatëzëna nga Ostreni. Ndërkohë që një grua nga Luznia është në gjendje të rëndë shëndetësore. Rrugët e bllokuara e bëjnë të pamundur transportin e tyre në spital.

Bllokohet sërish nga bora Qafa e Llogarasë. Burime nga policia e Vlorës thonë se reshjet e borës kanë nisur gjatë orëve të natës dhe vijojnë edhe në këto momente. Si pasojë e reshjeve të dendura të borës në rrugë janë krijuar shtresa ngrice. Një segment prej 6 kilometrash në Qafën e Llogarasë është i bllokuar tërësisht, ndërkohë që qarkullimi bëhet me vështirësi në këtë aks dhe vetëm me zinxhirë. Trashësia e borës arrin nga 20-30 cm. Për momentin nuk ka njoftime për makina të bllokuar në borë.

Dhjetë fshatra të komunës Çudhi në Malësinë e Krujës prej tre javësh janë në gjendje kritike për shkak të borës. Në parkun kombëtar të Qafë-Shtamës bora  arrin një trashësi 1.5  deri ne 2 metra. Udhëtimi nga qendra e komunës në fshatin më të afërt Bruz ka zgjatur rreth 2 orë në një gjatësi prej 3 km.