Bregu: Vlerësimet për zgjedhjet, Shqipëria, më afër BE-së

Vlerësimet që vijnë nga Brukseli dhe përfundimet e raportit të OSBE/ODIHR-it për zgjedhjet e 28 qershorit janë një rikonfirmim i qartë se Shqipëria është sot më afër se kurrë Bashkimit Evropian. Madje, përmes këtyre zgjedhjeve, Shqipëria ka mundur të tejkalojë testin e rëndësishëm politik, duke i hapur rrugën kështu integrimit në familjen evropiane. Këtë bindje shprehu dje në emër të qeverisë zëdhënësja e Këshillit të Ministrave, Majlinda Bregu, sipas së cilës këto zgjedhje shënuan progres të prekshëm. Bregu i bëri thirrje opozitës që t’i lexojë këto mesazhe vlerësuese për zgjedhjet e 28 qershorit me syrin dhe paanësinë e partnerëve të Shqipërisë në Evropë. Znj. Bregu përshëndeti deklaratën e fundit të ministrit të Jashtëm suedez, Carl Bildt, dhe komisionerit evropian për Zgjerimin, Olli Rehn, për sa u përket standardeve të zgjedhjeve të 28 qershorit. “Përshëndes deklaratën e Presidencës së Bashkimit Evropian, dhënë nga ministri i Jashtëm suedez, Carl Bildt, dhe atë të komisionerit evropian për Zgjerimin, Olli Rehn, të cilët kanë vërtetuar edhe një herë me deklaratën e tyre se Shqipëria e ka kaluar suksesshëm testin e zgjedhjeve parlamentare të 28 qershorit”, - u shpreh znj. Bregu. Por, BE-ja inkurajon po aq dhe debatin politik. Në këtë pikë, Bregu ftoi opozitën të ndalojë bojkotin dhe të marrë pjesë në Kuvend si një hap i vlefshëm dhe për proceset integruese, ku është përfshirë vendi. Shqipëria ka tejkaluar testin më të rëndësishëm politik, që lidhej me zgjedhjet parlamentare. “Deklaratat e Presidencës suedeze dhe komisionerit Rehn se vendi pas këtyre zgjedhjeve është në një pozitë më të mirë për sa i përket perspektivës evropiane, janë konfirmim i përgjegjshmërisë me të cilën qeveria shqiptare ka zbatuar dhe do të zbatojë të gjitha detyrimet që afrojnë vendin më shumë me Bashkimin Evropian”, - nënvizoi znj. Bregu. “Pas raportit, - shtoi ajo, - të publikuar nga misioni i OSBE/ODIHR-it, në të cilin theksohet se këto zgjedhje kanë shënuar progres krahasuar me zgjedhjet e mëparshme dhe se nuk kishte prova për manipulim rezultati apo për numërim të parregullt, vijnë dhe deklaratat e përfaqësuesve më të lartë të Bashkimit Evropian, të cilët gjithashtu konfirmojnë se Shqipëria është sot më afër BE-së”. Ne këtë pikë, ministrja e Integrimit, Majlinda Bregu, ftoi edhe një herë opozitën të zërë vendin e saj në Parlament dhe kryetari i PS-së, Edi Rama, t’i lexojë këto mesazhe vlerësuese për zgjedhjet e 28 qershorit me syrin dhe paanësinë e partnerëve të Shqipërisë në Evropë. “E ftoj opozitën e Ramës që të vijë në Parlament e të dëshmojë se plotësimi i detyrimeve për të qenë sa më shpejt në Bashkimin Evropian është detyrimi politik e qytetar i gjithkujt që ka kërkuar dhe ka marrë votën e shqiptarëve në 28 qershor për të realizuar sa më parë ëndrrën e përbashkët evropiane”, - theksoi znj. Bregu. Zgjedhjet e 28 qershorit, për herë të parë në historinë e zhvillimit të zgjedhjeve demokratike u vlerësuan mbi bazën e standardeve më të larta në Unionin Evropian. Vlerësimi pozitiv i zgjedhjeve i ka hapur dritën jeshile vendit për një proces të rëndësishëm sikundër është shqyrtimi i aplikimit për statusin e vendit kandidat në BE, një çështje që do të marrë përgjigje brenda muajit tetor, nisur nga deklarimet optimiste të Presidencës së radhës së BE, Suedisë.