Cana kërkon të kthehet në mesfushë

Në katër ndeshjet e fundit të Olimpik Marsejës, Lorik Cana është aktivizuar si mbrojtës qendre. Kjo zgjidhje ka qenë e detyruar për trajnerin Gerets, pas mungesave të shumta në këtë repart, por kapiteni i skuadrës kërkon të kthehet në rolin e tij natyral, atë të mesfushorit shkatërrues.

Dëmtimet e Roland Zubar dhe Zhulien Rodriguez dhe pasiguria e paraqitur nga Elamin Erbat, bënë që Cana (ashtu si ndodh shpesh edhe në Kombëtare) të improvizohet mbrojtës.

Megjithatë, 25-vjeçari shpreson të rikthehet sa më shpejt në pozicionin ku mund të jap maksimumin. “Aktivizimi im në mbrojtje është i përkohshëm dhe erdhi pas vendimit të marrë me trajnerin”, tha lojtari kuqezi.

“Kanë munguar Roland (Zubar), për shkak të problemeve me shëndetin dhe Zhulien (Rodriguez), i cili pritet të rikthehet në fushë”. Mediat e ndryshme franceze kujtojnë se me Lorik Canën, të aktivizuar në mesfushë, Marseja pëson më pak gola, ndërkohë që këmbëngulin se shqiptari mund të jetë mërzitur nga roli në mbrojtje.