City, pas 10 vjetësh, si Reali

Roberto Mancini thotë se Manchester City nuk është i madh, e as i suksesshëm sa Real Madridi, por pret që ekipi i tij pas 10 vjetësh të arrijë në nivel të njëjtë me gjigantin madrilen.

City do të udhëtojë në Santiago Bernabeu për ndeshjen hapëse të fazës së grupeve të Ligës së Kampionëve, ndërsa italiani shpreson që ekipi i tij mund të ketë paraqitje të mirë në kryeqytetin spanjoll, pasi e vuajti eliminimin zhgënjyes nga e njëjta fazë sezonin që shkoi.

“Është e vërtetë se ne nuk e kemi historinë e Real Madridit, por Manchester City ka fituar disa trofe. Ne duam të fitojmë tash. Në 10 vjetët e ardhshëm, do të jemi ekip i madh si Reali”, theksoi trajneri italian, duke iu përgjigjur trajnerit të Realit, Jose Mourinho, që theksoi se City nuk mund t’i blejë me para historinë dhe trofetë e gjigantit madrilen.

Ish-trajneri i Interit ka kërkuar nga lojtarët e tij që të kenë kujdes nga Cristiano Ronaldo, për të cilin thotë se është e vështirë të ndalet.