Clash of the Titans, një udhëtim në mitologjinë greke

Ndërsa jehona e premierës së Clash of  the Titans  është akoma e freskët së bashku me kritikat pozitive të shtypit të huaj, të specializuar, beteja mitike mes njerëzve, mbretërve dhe perëndive vjen edhe në Tiranë. Kinema Millennium sjell këtë superprodhim epik edhe për publikun shqiptar,

i cili do të ketë mundësi të shikojë këtë film, pasi projektimi i tij ka filluar që dje. Clash of the Titans është një film epik, që gërsheton aventurën dhe misterin, realen dhe irrealen. Ai është konsideruar nga kritika si një udhëtim i suksesshëm fantastik dixhital në mitologjinë greke, me një beteje mes njerëzve, zotave dhe përbindëshave. Filmi është përcaktuar edhe si një provë për yllin e ri të kinemasë, Sam Worthington. Por aktori i cili në film është Perseu, nuk është i vetëm pasi në krah të tij interpretojnë edhe Liam Neeson (Zeus), Ralph Fiennes (Had), Jason Flemyng (Calibos), Gemma Arterton ( Io) apo Alexa Davalos (princesha Andromeda). Që nga dita e premierës së tij, filmi ka arkëtuar në Shtetet e Bashkuara të Amerikës 61.400.000 dollarë duke u renditur në krye të listës së filmave më të ndjekur aktualisht nga publiku amerikan. Clash of the Tirans ngrihet mbi një betejë mitologjike për pushtetin, që i kundërve njerëzit me mbretërit dhe këta të fundit me zotat. Por lufta mes perëndive mund të shkatërroje botën. I lindur nga zot, por i rritur mes njerëzve, Perseu përpiqet të shpëtojë familjen e tij nga Hadi dhe hakmarrja e kundërshtarëve. Ai drejton një mision për të shkatërruar Hadin e për ta bërë këtë atij i duhet e kalojë në botë të panjohura e të ndaluara. Ky film do të inaugurojë një ofertë të re të Millennium, të pagëzuar si premiera e të premtes. Për çdo të premte në kinema Millennium krahas filmit, që do të jetë duke u shfaqur gjatë javës do të projektohet edhe një film i ri.

Last Updated on E Enjte, 08 Prill 2010 18:46