DASH përgëzon Shqipërinë për zgjedhjet e 28 qershorit

Shtetet e Bashkuara përgëzojnë Shqipërinë dhe qytetarët e saj për zgjedhjet e 28 qershorit 2009. Një zëdhënëse e Departamentit amerikan të Shtetit, deklaroi se qytetarët e Shqipërisë meritojnë të lavdërohen që dolën në votime në një numër të konsiderueshëm dhe për zhvillimin e zgjedhjeve në mënyrë paqësore dhe me rregull. Ajo vlerësoi faktin se zhvillimi i zgjedhjeve, përbën përparim real në krahasim me zgjedhjet e mëparshme.  Vlerësimi paraprak i OSBE/ODIHR-it vë në dukje se zgjedhjet në vetvete demonstruan përmirësime, por gjithashtu vëren se u konstatuan disa shkelje në procesin zgjedhor.  Shtetet e Bashkuara i bëjnë thirrje qeverisë së Shqipërisë, tha zëdhënësja e Departamentit amerikan të Shtetit, ti analizojë ato, nënvizoi ajo. Ndër të tjera, DASH në deklaratën për shtyp bën të ditur se SHBA e ka të qartë, faktin se qeveria e Shqipërisë është në përfundim të numërimit të votimeve dhe përpilimit të listës së rezultateve dhe presin që ky proces të zhvillohet në të njëjtën mënyrë të rregullt.