Dalglish lavdëron Maxin

Menaxheri i Liverpoolit, Kenny Dalglish, e ka lavdëruar mesfushorin ofanziv në formë Maxi Rodriguez pas ‘hat-trickut’ që e realizoi në fitoren 5:2 ndaj Fulhamit, të hënën mbrëma.

Futbollisti argjentinas shënoi 7 gola në tri ndeshjet e fundit, duke u konfirmuar si lojtari më në formë te Reds në këtë fund sezoni në Premierligë.

Golat e tij në stadiumin Craven Cottage, duke iu bashkangjitur edhe ato të Dirk Kuyt e Luis Suarez, e shohin Liverpoolin të përforcuar në pozitën e pestë, përpara Tottenhamit.
“Maxi është lojtar mjaft inteligjent. Ai e di se ku dhe kur duhet të lëvizë. Për momentin ai po dhuron magji. Ai meriton duartrokitje”, theksoi Daglish për BBC.

“Ai është lojtar i aftë dhe i shkathët. Shumë topa janë drejtuar tek ai dhe Maxi ka qenë aty në kohën e duhur”, vazhdoi trajneri anglez.

Maxi Rodriguez ishte transferuar në Liverpool nga Atletico Madrid, dy sezone më parë. Ai ishte një hije tek ekipi anglez, por shpërtheu në fund të sezonit.