Debate në KQZ për 9 kutitë e Fierit, Ristani: Rinumërimi, pas ankimimit

Tiranë, 6 korrik, NOA Komisioni Qendror i Zgjedhjeve është përfshirë sot nga një debat mes anëtarëve të tij për çështjen e numërimit të 9 kutive të votimit të Fierit, sipas pretendimit të Partisë Socialiste.

Kutitë e Fierit duhet të numërohen, pasi vendimmarrja nga KZAZ në këtë qytet ka qenë politike, ka deklaruar anëtarja socialiste e KQZ-së, Dëshira Subashi.

Por kryetari Arben Ristani ka reaguar ndaj një argumenti të tillë duke pohuar se kutitë hapen pas ankimimit të partive dhe se duhet të bëhet miratimi i tabelave përmbyllëse.

Sipas Ristanit, Fieri nuk është njësoj si rast me numërimin që iu bë votave të Fushë-Kuqes.

Të dhënat tregojnë se janë 9 kuti votimi nga qarku i Fierit, ende të panumëruara në KQZ. Kodi Zgjedhor i Shqipërisë parashikon që subjektet politike mund të ankohen në KQZ-së dhe në Kolegjin zgjedhor, për rezultatet vetëm pasi të publikohen tabelat e tyre përmbyllëse. Përfaqësuesit e Partisë Socialiste në KQZ kanë kundërshtuar hartimin e këtyre tabelave pa u numëruar të gjitha kutitë.

Kutitë e Fierit u sollën në Tiranë para disa ditësh, pas krijimit të n jë përplasje mes komisionerëve socialistë dhe atyre demokratë.

n.e/NOA