Deputetët, fondet në dorë të Topallit
BLEDAR HOTI
Shpenzimet e karburantit për deputetët do të vendosen nga vetë Kryetarja e Kuvendit, Jozefina Topalli. Qeveria me projektligjin e ri për uljen e shpenzimeve të zyrtarëve të lartë, i ka lënë të drejtën ekskluzive kryeparlamentares për të përcaktuar kuotën që nevojiten për 140 të zgjedhurit e popullit. Në draftin e depozituar nga Qeveria sanksionohet se duhet të ketë një kriter për ndarjen e fondit, duke i ndarë deputetët sipas qarqeve, largësisë që kanë ata në raport me Tiranën. “Masa e përfitimit financiar mujor për çdo deputet do të miratohet me Vendim të Kuvendit, në bazë të distancës me zonën që ai përfaqëson, por, në nivelin mesatar, kjo masë nuk mund të jetë më shumë se 45 mijë lekë në muaj”, thuhet në nenin 2, pika 2 të këtij drafti. Në variantin e parë të qeverisë, parashikohej që tarifa për shërbimin e transportit të zyrtarëve të kategorisë së dytë, ku përfshihet dhe deputeti, përcaktohet me vendimin e qeverisë, ku efektet financiare përballoheshin nga buxheti i shtetit. Tashmë me këtë ndryshim, Qeveria, duhet të parashikojë një fond të posaçëm në buxhetin e Kuvendit për përballimin e shpenzimeve të transportit. Gjithashtu janë përcaktuar edhe limiti i fondit që duhet të përdorin funksionarët e qeverisë, të përfshira në kategorinë e tretë, duke e zbritur në 15 mijë lekë nga 20 mijë lekë që propozohej në variantin e parë. “Kategoria e tretë, ku përfshihen funksionarë të nivelit të drejtorit i përgjithshëm/titullar institucioni/titullar i ndërmarrjeve publike, që nuk përfshihen në kategorinë e parë dhe në të dytën, të cilët do të marrin një përfitim financiar mujor në përputhje me veprimtarinë e tyre, por jo më shumë se 15 mijë lekë në muaj. Kjo kategori dhe masa e këtij përfitimi mujor përcaktohen me vendim të Këshillit të Ministrave”, thuhet në pikën 3 të nenit 2. Në draftin final “Për Rregullimin e shërbimit të transportit për funksionarët e lartë dhe nëpunësit civil” është caktuar se zyrtarët e rangut të lartë, si Presidenti, Kryeministri, Kryeparlamentarja, duhet të derdhin një shumë të caktuar në rast se e përdorin makinat e tyre gjatë fundjavave dhe apo në ditë festash. “Funksionarët që kanë të drejtën të përdorin mjetet, nëse dëshirojnë t’i përdorin ato edhe për qëllime që nuk lidhen me funksionin apo detyrën që ushtrojnë, p.sh në ditë pushimi të festave zyrtare, gjatë fundjavave, si dhe në ditët e lejes së pushimit vjetor, duhet të derdhnin në Drejtorinë e Përgjithshme të Financave të institucionit që përfaqësojnë shumën prej 50 mijë lekësh në vit”, thuhet në nenin 3 të projektit. Ndërsa ka bërë ulje të shpenzimeve për një sërë institucionesh, siç janë shpenzimet për kreun e Agjencisë së Pronave, nga 35 mijë-20 mijë lekë në muaj. Të njëjtin fat kanë pasur edhe Komandanti i Forcave Ajrore të armatosura, prefektët, sekretarët e përgjithshëm dhe drejtorët e kabinetit të ministrit. Totali i efektit financiar të këtij projektligji shkon në 206.400.000 lekë dhe numri i zyrtarëve që përfitojnë janë 450 vetë gjithsej. Këtu nuk përfshihet numri i makinave në dispozicion të administratës qendrore dhe lokale. Kostoja financiare për përfituesit është llogaritur 32.222 lekë në viti nga 1.524.144 lekë në vit sa është aktualisht. Më projektligjin e ri tashmë institucionet qendrore do të ketë 30 shoferë me zyrtarë, nga 280 që kishin gjithsej.
projektligji ne kuvend
Funksionet që do të kenë mjete transporti në dispozicion
1. Presidenti
2. Kryetar Kuvendi
3. Nënkryetar Kuvendi
4. Kryeministër
5. Zv.kryeministër
6. Ministër
7. Prokuror i Përgjithshëm
8. Avokati i popullit
9. Kryetari i SHISH
10. Kryetari i Kontrollit të Shtetit
11. Kryetar i Gjykatës Kushtetuese
12. Shefi i Shtabit të Përgjithshëm të Ushtrisë
13. Drejtori i Përgjithshëm i Policisë
14. Kryetari i partisë së maxhorancës dhe më të madhe të opozitës
15. Kryetari i bashkisë së kryeqytetit
16. Kryetari i Gjykatës së Lartë
17. Kryetari i gjykatës së krimeve të rënda
18. Guvernatori i Bankës
19. Kryetari i Gjykatës së Apelit të Krimeve të Rënda
20. Komandanti i Gardës së Republikës
Funksionet që përfitojnë bonos
Posti bonusi (lekë/muaj)
1. Deputet 45.000
2. kryetar i Bashkisë Qendër Qarku 45.000
3. Kryetar i Autoritetit Mbikëqyrës F. 35.000
4. Kryetar i Komisionit të Konkurrencës 35.000
5. Kryetar i Kom. Mbrojtjes të dhënave personale 35.000
6. Kryetar i KSHC 35.000
7. Kryetar i KKRT 35.000
8. Kryetar i ERT 35.000
9. Kryetar i ERE 35.000
10. Kryetar i Entit Rreg. Ujërave të ndotura 35.000
11. Kryetar i ILDKP 35.000
12. Kryetar i KQZ 35.000
13. Kryetar i Akademisë së Shkencave 35.000
14. Rektorët e Universiteteve 35.000
15. Zv.kryetar i KLD 35.000
16. Kryetar i Këshillit të Qarkut 35.000
17. Gjyqtarët e gjykatës së lartë dhe gjyk. Kushtetuese 35.000
18. Kryetar i gjykatës së shkallës I, Apelit, Krimet e Rënda 35.000
19. Drejtues i Prokurorisë pranë Gjykatës së shkallës I,
Apelit, Krimeve të rënda 35.000
20. Kryetar Bashkie 30.000
21. Avokat i Prokurimeve Publike 30.000
22. Avokati i Shtetit 30.000
23. Dekan i universiteteve 20.000
24. Sekretar i përgjithshëm dhe drejtorët e kabinetit të ministrit 15.000
Funksionet që përfitojnë bonos
Posti bonusi (lekë/muaj)
1. Zv.ministër 35.000
2. Sekretar i përgjithshëm në Presidencë/ Parlament/ Kryeministri 35.000
3. Drejtor i Kabinetit në Presidencë/ Parlament/ Kryeministri 35.000
4. Këshilltarët në Presidencë/ Parlament/ Kryeministri 35.000
5. Gjeneral lejtnant dhe gjeneral major 20.000
6. Komandant i FA tokësore, detare, ajrore 20.000
7. Drejtor i Përgjithshëm i Tatimeve 20.000
8. Komandant Garde 35.000
9. Titullar i ZRRPP 35.000
10. Kryetar i AKKP 20.000
11. Kryetar i Komitetit Shtetëror të Kulteve 20.000
12. Drejtor i Përgjithshëm i Doganave 20.000
13. Drejtor i Përgjithshëm i Burgjeve 35.000
14. Titullar i zyrës qendrore të ALUIZNI 20.000
15. Gjeneral Brigade 15.000
16. Prefekt 15.000
17. Drejtor i Përgjithshëm i Emergjencave Civile 15.000
18. Drejtues i Policisë së Qarkut 15.000
19. Drejtues i SHISH i Qarkut 15.000
20. Drejtor i Përgjithshëm i ISSH 15.000
21. Drejtor i Përgjithshëm i ISKSH 15.000
22. Drejtor i Përgjithshëm i Rrugëve 15.000
23. Drejtor i Përgjithshëm i Pyjeve 15.000
24. Drejtor i Ujësjellësit 15.000
25. N/kryetar i Akademisë së Shkencave 20.000