Deputeti "memec"

Flori Bajramaj kaloi katër vjet pa u vënë re në sallën e Kuvendit të Shqipërisë. Rezultatet e disa anketave të zhvilluara gjatë viteve 2005-2009 nga organizata "Mjaft!" e nxirrnin Bajramajn gjithnjë në krye të listës së deputetëve inaktivë. Bajramaj, i panjohur si fytyrë dhe emër jo vetëm për pjesën dërrmuese të shqiptarëve, por edhe për vetë banorët e zonës së tij zgjedhore, përmendet në raporte të mediave në katër vjet vetëm si emër në lista deputetësh që përbëjnë një grup parlamentar apo një komision parlamentar, ose për pasivitetin e tij olimpik në sallën e Kuvendit. Nga studimet e organizatës "Mjaft!", ka rezultuar që deputeti nuk ka folur as edhe një herë të vetme gjatë një sesioni parlamentar që zgjat nga tre deri në gjashtë muaj.