Dhunohet pllakada me emrin e Kadri Roshit

 

KUÇOVE - Dhunohet pllakada në kinemanë e qytetit të Kuçovës, mbi të cilën ishte gdhendur një emër i madh i kinematografisë shqiptare, Kadri Roshi. Persona ende të paidentifikuar e kanë thyer, duke e shkatërruar plotësisht atë. Banorët e Kuçovës janë mjaft të indinjuar karshi një ngjarje të tillë. Emri i artistit të Popullit Kadri Roshi, ishte propozuar dy vjet më parë nga intelektualët dhe banorët e këtij qyteti. Bashkia vendosi t’i hiqte kinemasë emrin që mbante deri në atë kohë, “Alen Delon” dhe ta zëvendësonte atë me emrin e artistit shqiptar, Kadri Roshi. Ndonëse kanë kaluar dy muaj nga kjo ngjarje, policia ende nuk ka mundur të identifikojë apo kapë autorin e shkatërrimit të pllakadës. Tashmë kinemaja e qytetit është pa emër. Prej disa vitesh kjo kinema nuk është funksionale por sërish banorët i kërkojnë pushtetit vendor të rivendosë një tjetër pllakadë me emrin e aktorit, rolet e të cilit janë memorizuar mjaft mirë tek mijëra kuçovarë. Gjithashtu, ata i kërkojnë policisë të marrë masa që ngjarje të tilla, që konsiderohen prej tyre si akte të shëmtuara, të mos përsëriten më. “Ne duhet ta kemi për nder që kinemaja e qytetit tonë mban një emër kaq të madh, siç është ai i Artistit të Popullit, Kadri Roshi. Bashkia duhet të marrë masa dhe të vërë një tjetër pllakadë, pasi kinemaja nuk duhet të mbetet pa emër”, shprehen intelektualë të këtij qyteti.                                  d.xh