Diabeti, përplasen shifrat

• Përplasen shifrat e Ministrisë së Shëndetësisë dhe OBSH-së për numrin e të prekurve nga diabeti.Nëse zyrtarisht në vendin tonë raportohen 30 mijë persona që vuajnë nga kjo sëmundje, Organizata Botërore e Shëndetësisë jep të tjera të dhëna. Sipas kësaj organizate, numri i të sëmurëve me diabet në vendin tonë arrin në mbi 84 mijë veta. Madje, OBSH duke parë ritmet me të cilat prevalenca e kësaj sëmundjeje po rritet, parashikon që për vitin 2030 prej saj të vuajnë 188 mijë veta, apo rreth 9% e popullsisë. Por, tek ne problemi nuk është te shifrat sesa te mungesa e diagnostikimit, kjo pasi një pjesë e konsiderueshme e personave  me diabet konsiderohen thjesht të "shëndoshë". Diabeti i padiagnostikuar, sipas mjekëve, nuk shfaq shqetësime, por mjafton një rritje e vogël e sheqerit në gjak për njëfarë kohe, që të shkaktohen dëmtime të pakthyeshme të enëve të gjakut. Këto dëmtime të enëve mund të nxjerrin sytë, apo veshkat jashtë funksionit.