Djegia e makinës, zbardhen dosjet e ish-prokurorit

SARANDE - Edhe pse puna hetimore po vazhdon intensivisht, ende ngelet pa autor ngjarja e dy netëve më parë kur persona të paidentifikuar i vunë zjarrin makinës së ish-prokurorit të Sarandës, Arben Koka. Sipas burimeve policore, bëhet e ditur se nga ana e agjentëve të policisë kriminale të Sarandës janë shoqëruar për në mjediset e Komisariatit dhe janë marrë në pyetje 4 shtetas, dy prej të cilëve persona me precedentë penalë. Policia gjithashtu pohon zyrtarisht se në vendin e ngjarjes është gjetur shishja, si dhe një gazetë e bërë si fitil, me qëllimin për t’u përdorur për djegien e makinës. Vetë ish-prokurori, sot avokat, thotë se dyshon që ngjarja të ketë lidhje me detyrën. Ai kujton 3 çështje, një për vjedhje, tjetra për rrëmbim personi dhe e treta vjedhje me djegie të mjetit, ku ka kërkuar dënime të konsiderueshme. Policia po heton mbi personat që janë liruar pas kryerjes së dënimeve. sh.d