Doganat, në 11 muaj arkëtojnë 95,5 miliardë lekë në buxhetin e shtetit
Administrata doganore arkëtoi 95 miliardë e 555 milionë lekë në buxhetin e shtetit për 11-mujorin e vitit 2008, duke realizuar planin në masën 100.1 për qind. Burime zyrtare të Drejtorisë së Përgjithshme të Doganave bënë të ditur se gjatë periudhës janar-nëntor u arkëtuan në buxhetin 86 milionë lekë më shumë se plani. "Administrata doganore arkëtoi në buxhetin e shtetit 95 miliardë e 555 milionë lekë nga 95 miliardë e 469 milionë lekë që ishte plani i përcaktuar nga Ministria e Financave, me një tejkalim prej 86 milionë lekësh, ose 0.1 për qind", - bënë të ditur burimet e mësipërme. Krahasuar me realizimin faktik të të ardhurave për të njëjtën periudhë të një viti më parë (janar-nëntor 2007), rritja është 14% ose 11 miliardë e 361 milionë lekë më shumë. Eksportet "Made in Albania" drejt vendeve të tjera u rritën me 39 për qind në periudhën janar-nëntor të vitit 2008. "Gjatë periudhës janar-nëntor 2008 është realizuar një rritje 17% e volumit në total të eksporteve shqiptare krahasuar me të njëjtën periudhë të një viti më parë, ndërsa eksportet me origjinë shqiptare "Made in Albania" kanë një rritje 39% të shprehur në vlerë",- tha DPD-ja. Sipas DPD-së, gjatë kësaj periudhe u realizua një volum mallrash në sasi prej 1.631.665 tonësh, krahasuar me 1.574.642 tonë mallra që janë eksportuar gjatë 11-mujorit 2007.
Zhdoganimet e karburanteve u rritën me 3 për qind në 11 muaj
Zhdoganimet e karburanteve gjatë periudhës janar-nëntor të vitit 2008 janë rritur me 3 për qind, kundrejt të njëjtës periudhë të një viti më parë (2007). Sipas të dhënave zyrtare të publikuara nga Drejtoria e Përgjithshme e Doganave, gjatë 11 muajve 2008 u zhdoganuan 384,925 tonë karburante nga 374,325 tonë të zhdoganuara në të njëjtën periudhë të një viti më parë, me një rritje prej 10,600 tonësh.
27 Dhjetor 2008