Drita e ndriçon Vushtrrinë

Pamposhtmërisë së Llamkos Kosovës i erdhi fundi të enjten, në xhiron e katërt të Superligës. Skuadra vushrriase është mposhtur në shtëpi nga Drita me rezultat minimal 0:1. Goli i Leonit Abazit ishte shumë i vlefshëm për gjilanasit, të cilët e ndriçuan Vushtrrinë duke e regjistruar fitoren e tretë. Ndërkaq, në duelin tjetër, Trepça ’89 ishte bindshëm më e mirë se Ferronikeli.

Drita ia ka shkaktuar Llamkos Kosovës humbjen e parë të sezonit. Skuadra gjilanase e ‘pushtoi’ Vushtrrinë duke fituar me rezultat minimal 1:0.

Skuadra vushtrriase e pati iniciativën e lehtë të lojës, por nuk arriti t’i shfrytëzojë disa raste që i ndërtoi.

Në anën tjetër, mysafirët pas një kundërsulmi të organizuar në minutën e 32-të e realizuan golin përmes Leonit Abazit, të cilin e ndihmoi devijimi i topit nga ana e Alban Dragushës.

Bardhekaltrit e lëshuan rastin më të mirë të takimit në minutën e 63-të, kur Labinot Jetullahu e humbi penalltinë pasi më parë një lojtar gjilanas e preku topin me dorë. Pas kësaj fitoreje, Drita u ngrit në pozitën e dytë të tabelës, kurse Llamkos Kosova mbeti në pozitën e shtatë.

Ferronikeli – Trepça ’89 1:4

Trepça ’89 e ruajti pamposhtmërinë, duke siguruar fitore bindëse ndaj Ferronikelit në ndeshjen e zhvilluar në stadiumin ‘Agron Rama’ në Obiliq. Përkundër disa rasteve të ndërtuara, skuadrat nuk arritën ta gjenin golin në pjesën e parë.

Ndërkaq, ‘Xehetarët’ u ndezën në 25 minutat e fundit, kur edhe realizuan katër gola. Ata e nisën serinë e golave në minutën e 66-të me anë të Samir Sahitit, ndërsa Dukagjin Gashi shënoi autogol 5 minuta më vonë. Isuf Llumnica realizoi për golin e tretë (80’), ndërsa Sahiti e shtoi avantazhin e mysafirëve në atë të 82-të.

Ferronikeli e shënoi golin e nderit në minutën e 88-të me anë të Fatih Karahodës. Ekipi nga Drenasi mbeti me një lojtar më pak nga minuta e 68-të, pas ndëshkimit me karton të kuq të Fidan Gërbeshit.

Superliga – Xhiroja e katërt

Tabela

1. Prishtina 12 pikë

2. Drita 9

3. Trepça ’89 8

4. Hajvalia 7

5. Vëllaznimi 7

6. Trepça 6

7. Kosova (V) 5

8. Drenica 4

9. Liria 3

10. Ferronikeli 3

11. Hysi 2

12. Besa 1