Durrës, përkujtohet 70 vjetori i rezistencës ndaj pushtimit italian

Është përkujtuar në Durrës 70- vjetori i rezistencës ndaj pushtimit Italian. Në ceremoni merrnin pjesë kryetari i Bashkisë së Durrësit, Vangjush Dako, përfaqësues të tjerë të pushtetit vendor, veteranë, përfaqësues të forcave politike, përfaqësues të besimeve fetare dhe shumë qytetarë durrsakë, të cilët kanë bërë homazhe pranë bustit të Mujo Ulqinakut, ku kanë vendosur edhe kurora me lule. Të pranishmit kanë vlerësuar sakrificat e atyre që u bënë qëndresë ditën e 7 prillit të 1939 ndaj fashizmit, duke dhënë jetën e tyre për këtë vend. Kreu i bashkisë së Durrësit, Vangjush Dako, i cili hapi ceremoninë përkujtimore, theksoi se liria u arrit me gjak e sakrifica që na rreshtuan në atë kohë në aleancën antifashiste e që e kujtojmë me respekt të thellë sot pas 70 vjetësh, kur vendi ynë sapo është bërë pjesë e aleancës së lirisë, e NATO-s. Heronjtë dhe luftëtarët e 7 prillit dhe të gjithë heronjtë e popullit shqiptar bënë detyrën ndaj atdheut, ngritën lart dinjitetin kombëtar, ruajtën pavarësinë e Shqipërisë duke i thënë botës me krismat e pushkëve të tyre se ata nuk pajtoheshin me pushtimin dhe me fashizmin. Këtë gjë bënë edhe të gjithë popujt me dinjitet, që sot janë baza e BE dhe e NATO-s, të cilat janë ngritur nga shtetet e lira të dala nga një luftë e madhe antifashiste dhe patriotike, siç ishte lufta e popujve kundër fashizmit dhe nazizmit. Sot është një ditë e rëndësishme për të kujtuar të gjithë ata që luftuan për pavarësinë e Shqipërisë dhe për mbrojtjen e integritetit territorial dhe sovranitetit të saj, të cilët në 7 Prill të 1939 luftuan dhe dhanë jetën kundër okupacionit të vendit, siç është rasti i Mujo Ulqinakut dhe heronjve e dëshmorëve të tjerë, u shpreh kryebashkiaku Dako. Mujo Ulqinaku dhe të gjithë patriotët e tjerë nga Durrësi por edhe nga qytete të tjera ishin të parët që e pritën me pushkë pushtuesin italian dhe në këtë luftë ra hero Ulqinaku por edhe dëshmorë të tjerë. Në rezistencën kundër nazifashistëve u bashkuan në mënyrë masive banorët durrsakë dhe patriotë të ardhur nga çdo anë e vendit. Më 7 prill të 1939-ës, banorët u detyruan me forcë ta braktisnin qytetin ndërsa të rinjtë u internuan në kampet e përqendrimit. Ata që mundën ti bënin rezistencë pushtuesit italian, mbetën të përjetshëm në historinë e këtij qyteti.