Dy viktima në Fushë-Krujë dhe Elbasan

Dy vetëvrasje janë regjistruar gjatë 48 orëve të fundit. Agim Roda, 47 vjeç, lindur dhe banues në lagjen "Kastrioti" të Fushë-Krujës ka pirë fostoksinë. Me të konstatuar gjendjen e tij të rëndë, familjarët e kanë dërguar menjëherë për në Spitalin Ushtarak të Tiranës, për t‘i dhënë ndihmë mjekësore. Por me gjithë përpjekjen për ta mbajtur në jetë, në orën 23:15, rreth pesë orë pas pirjes së helmit, Roda ka ndërruar jetë në spital. Kufoma është dërguar në morgun e spitalit për t‘iu nënshtruar autopsisë dhe po punohet për zbardhjen e rrethanave të ngjarjes. Viktima ishte baba i dy fëmijëve të mitur, ndërkohë që njihej si përdorues i pijeve alkoolike. Të njëjtën mënyrë vetëflijimi ka përdorur dhe 42-vjeçarja, Emine Muça nga Elbasani. Nëna e dy fëmijëve, prej pak kohësh kishte ardhur në Elbasan nga fshati Godolesh i Gramshit. Ajo ka pirë fostoksinë në shtëpinë e saj, në lagjen "5 Maji" të qytetit. Sipas burimeve policore, 42-vjeçarja, e gjetur nga të afërmit e saj, e shtrirë dhe në gjendje kome, është dërguar në spital, ku mjekët janë munduar ta shpëtojnë. Policia bën të ditur se gruaja prej kohësh vuante nga depresioni.