Dylgjeri: Meta zhveshi politikisht Ramën

• Zëdhënësi pranë zyrës së ish-kryetarit socialist, Fatos Nano, Ylli Dylgjeri, tha dje në një prononcim për mediat se, deklaratat e Ilir Metës vërtetuan ato që Nano i kishte shprehur në takimet e tij me socialistët nëpër qytete të vendit."Edi Rama u zhvesh fizikisht, ndërsa Ilir Meta e zhveshi atë politikisht", u shpreh Dylgjeri. Duke vlerësuar konstatimet e bëra nga kreu socialist për mënyrën e trajtimit të koalicionit opozitar, Dylgjeri shtoi se, "në të njëjtën mënyrë Rama ka trajtuar dhe trajton të gjithë socialistët e vërtetë në PS". "Defektet e Edi Ramës në drejtimin e PS-së dhe aleancat e fshehta të tij me Sali Berishën për interesa të ngushta personale janë denoncuar nga Fatos Nano në çdo qytet të vendit gjatë turit të tij", tha Dylgjeri. Sipas tij, "qëndrimi i mbështetësve të Nanos, në drejtim të koalicionit të ri të anuncuar nga Ilir Meta do të merret në ditët në vazhdim pas konsultave me të gjithë anëtarët dhe simpatizantët socialistë".