E ardhmja e Skelës në kampionatin turk

Ka prej më shumë se një muaji që i ka shkëputur të gjitha marrëdhëniet me klubin e tij të fundit në Bundesligë, Energji Kotbuz, i cili ra në Bundesligën 2, por ende nuk ka vendosur se ku do ta vazhdojë karrierën e tij në sezonin e ardhshëm. Bëhet fjalë për mesfushorin shqiptar, Ervin Skela, i cili, sipas shtypit gjerman ka marrë një ofertë edhe nga FSV Frankfurt i Bundesligës 2 gjermane. Mësohet se fantazisti shqiptar është kontaktuar nga klubi, i cili i ka bërë një ofertë. Me gjithë xhentilesën për të pranuar të ulet në bisedime, kjo ofertë është refuzuar nga Skela. Këtë e lë të nënkuptohet shkrimi i gazetës "Frankfurter Rundschau", ku citohet se e ardhmja e futbollistit shqiptar duket shumë pranë kalimit të tij në kampionatin turk, nga ku ka marrë një ofertë shumë joshëse (1.5 milionë euro në sezon nga Trabzonspori).