E bija e adoptuar e Gaddafit është gjallë?

Hana, vajza e adoptuar e Muammar Gaddafit e konsideruar si e vdekur pas bombardimeve të SHBA-së në vitin 1986, në fakt mund të jetë gjallë, ndërsa deri tani ka punuar dhe jetuar në Tripoli.

Disa dokumente të gjetura në bunkerin e Gaddafit në Tripoli tregojnë se vajza është rritur duke studiuar mjekësinë, ndërsa ka mësuar edhe anglisht, nëpërmjet British Council në Tripoli.

Dokumentat janë gjetur në një dhomë të bunkerit, e cila mendohet se ishte dhoma e Hanës.

Sipas “Irish Times”, shumë prej libianëve kanë dyshuar se ai e ka përdorur vdekjen e vajzës së tij, për të përkrahur idenë se ajo ishte një viktimë e agresionit ushtarak perëndimor.

Ndër sendet e zbuluara në dhomën e saj janë vërtetimi i kontrollit në një nga fakultetet e mjekësisë në Libi, e nënshkruar “Hana Muammar Gaddafi”, në gjuhën arabe dhe një fotografi me vajzën tjetër të Gaddafit, Aisha.

Gjithashtu, është gjetur një certifikatë e British Council, e lëshuar më datë 19 korrik 2007, e cila tregonte se Hana ka arritur nivelin A të njohurive në anglisht.

Dokumentet janë gjetur nga korrespondenti i “Irish Times”, i cili ka treguar se në momentin e gjetjes së fotografive një nga kryengritësit ka bërtitur, “ Është Hana, Hana vajza e Gaddafit”.