“Edi Rama po merr përsipër trashëgiminë e ish-regjimit më gjakatar në Evropë”

Shkodër/ Ish-të përndjekurit politikë dënojnë vizitën provokative të kreut të PS-së në ish-burgun e Degës komuniste të Punëve të Brendshme 

“Ne ndjehemi të fyer nga kjo vizitë e improvizuar në ish-burgun e Degës së Punëve të Brendshme, nga kryetari i asaj opozite që me paturpësinë më të madhe, jo vetëm që nuk votoi ligjin e gjenocidit, por po mundohet që me të gjithë mekanizmat që ajo disponon për ta kundërshtuar dhe për ta bërë të pavlefshëm këtë ligj”

TIRANE - Në kulmin e betejës për hapjen e dosjeve të komunizmit, kryetari i Partisë Socialiste, Edi Rama, ka kryer dje një vizitë në ish-burgun e Degës së Punëve të Brendshme të para vitit 1990 në qytetin e Shkodrës, një veprim ky që është cilësuar si një provokim i hapur duke sjellë reagimin e menjëhershëm të degës së Shoqatës së ish-të Përndjekurve Politikë në këtë qytet. Ndonëse shoqëruesit e Ramës përsëritën disa herë se vizita e kreut të PS-së në ambientet e ish-burgut të diktaturës ishte krejtësisht private, të përndjekurit dolën me një deklaratë për shtyp duke e vlerësuar si provokim dhe fyerje të hapur këtë veprim.
Edi Rama vizitoi për rreth gjysmë ore burgun e ish-Degës së Punëve të Brendshme, ku vëzhgoi nga afër ambientet ku ishin mbajtur të dënuarit politikë si dhe gjurmët që kishin mbetur nga ajo kohë e errët e diktaturës. Pas kësaj vizite të papritur për shkodranët në përgjithësi dhe sidomos për të persekutuarit në veçanti, kreu i PS-së Rama u largua nga Shkodra pa dhënë asnjë prononcim jo vetëm për mediat, por edhe për të pranishmit që e shoqëronin. Vizita e Ramës në veri të vendit ka vijuar në qytetin e Pukës për t’u takuar me vullnetarët e fushatës së tij në atë zonë.
Sapo është marrë vesh kjo vizitë të përndjekurit e Shkodrës janë mbledhur dhe kanë dalë me një deklaratë për shtyp të bërë publike edhe për mediat nga  kreu i shoqatës së të persekutuarve, Kastriot Bajraktari.
Me anë të deklaratës Bajraktari theksoi se  vizita e kreut të PS-së Edi Rama në ish-burgun komunist është fyerja më e madhe që i është bërë kësaj shtrese.
“Ne ndjehemi të fyer nga kjo vizitë e improvizuar në ish-burgun e Degës së Punëve të Brendshme, nga kryetari i asaj opozite që me paturpësinë më të madhe, jo vetëm që nuk votoi ligjin e gjenocidit, por po mundohet që me të gjithë mekanizmat që ajo disponon për ta kundërshtuar dhe për ta bërë të pavlefshëm këtë ligj”, theksoi gjatë deklaratës kreu i të persekutuarve të Shkodrës, Kastriot Bajraktari.
Më tej me anë të kësaj deklarate të persekutuarit protestuan ndaj kësaj vizite të bërë nga Edi Rama si një kryetar i një subjekti që ka marrë mbi vete të gjithë trashëgiminë e ish-regjimit më gjakatar në Evropë. Kreu i shoqatës së të persekutuarve të Shkodrës, Bajraktari e mbylli deklaratën me një kërkesë drejtuar Edi Ramës, të cilit i kërkohej që “t’i ndalojë provokimet e tilla që ngacmojnë kujtesën jo vetëm të ish-shtresës së përndjekurve politikë por të mbarë popullit të Shkodrës, si mbartës mbi shpatullat e tij të pjesës më të rëndë të kalvarit komunist”.
Vizita e Edi Ramës në ish-burgun e Degës së Punëve të Brendshme të Shkodrës bëhet vetëm pak kohë pasi Ministria e Kulturës ka akorduar në buxhetin e vitit 2009 fondin prej 7.8 milion lekësh për kthim në muze të persekucionit komunist të kësaj ndërtese famëkeqe të gjithë periudhës së diktaturës në Shkodër.