Eduardi ia ka parë hajrin politikës. Ja si janë shtuar milionat e ministrit të Drejtësisë

Një apartament 65 m2 i ndërtuar përpara vitit 1990, një autoveturë dhe 33 përqind e një toke bujqësore në një fshat të Korçës e përfituar me 7501. Kjo ka qenë pasuria e qytetarit Eduard Halimi përpara se të bëhej politikani Eduard Halimi.

Gazeta Shqip në numrin e sotëm ka analizuar deklaratat e pasurisë së ministrit aktual të drejtësisë dhe aty del se pas 6 vitesh në politikë Halimi mund të konsiderohet tashmë një shqiptar i pasur.

Ish-gjyqtari i Gramshit, i kandiduar nga PD në Durrës në 2009, sipas raportimit të Shqip, tashmë disponon një mori pasurish të paluajtshme që nisin nga zyra me sipërfaqe 118 m2 në Bulevardin kryesor të Tiranës deri te apartamenti i banimit po në Tiranë prej 140 m2, një apartament në Durrës 68 m2, truall në Mullet 1100 m2, garazh 15 mijë euro, e po kështu ai deklaron se në vitin 2011, kohë në të cilën është emëruar si Ministër i Drejtësisë ka blerë një automjet Benz me vlerë 42 mijë euro. Pastaj renditen një seri transaksionesh dhe lëvizje pasurish të patundshme të gjitha në shifra me shumë zero nga pas. Ka ruajtur të pashitur edhe tokën bujqësore në Korçë.

Do ishte mirë që ILDKP përveç njoftimeve për gjobitjet me 25 mijë lekësha të atyre që harrojnë të dorëzojnë në kohë deklarimet e pasurive të sqaronte publikun hollësisht për raportime të tilla.

http://respublica.al/artikuj/2012/07/14/edhe-eduardi-ia-ka-pare-hajrin-politikes