Ekstradohen dy të dënuar për vrasje e trafik

KUKËS Dy ditë më parë nga Zyra Qendrore Kombëtare Interpol Tirana u krye ekstradimi nga Kosova drejt vendit tonë, nëpërmjet Pikës së Kalimit Kufitar Morinë, i dy shqiptarëve të shpallur në kërkim ndërkombëtar për vrasje dhe trafikim. Gerald Mitre, 28 vjeç, lindur në Kolonjë, i dënuar nga Gjykata e Rrethit Gjyqësor Durrës, me vendimin penal nr. 867, datë 14.10.2010, me 14 vjet burg, për kryerjen e veprës penale të “Vrasjes me dashje”, parashikuar nga nenet 76 dhe 49, të Kodit Penal të Republikës së Shqipërisë.

Në 2 janar 2006, në Londër, Angli, ai ka vrarë duke e goditur me thikë, shtetasin britanik Aaron Stokes, për motive të dobëta. Ndërsa Isat Metaliaj, 49 vjeç, lindur në Tropojë, i dënuar nga Gjykata e Shkallës së Parë për Krime të Rënda, me vendimin penal nr. 64, datë 16.11.2009, me 15 vjet burg, për kryerjen e veprës penale të “Trafikimit të femrave për prostitucion”, parashikuar nga neni 114/b, i Kodit Penal. Në datën 15 mars 2006, Shtetasi Isat METALIAJ, në bashkëpunim me një tjetër shtetas, kanë trafikuar për qëllime prostitucioni në Kosovë, shtetasen E.M., kundrejt shumës prej 300 Eurosh.