Ermela: Kam luftuar për çmimin
“Fitoren ja kushtoj forcës sime më të madhe, familjes sime, sidomos motrave”
“Fitoren ja kushtoj forcës sime më të madhe, familjes sime, sidomos motrave”. Kjo ishte deklarata që Ermela e tha para dhe pasi u kurorëzua fituese e edicionit të katërt të “Big Brother”. E para femër që fitoi këtë reality-show, Ermela, ka marrë çmimin 100 milionë lekë, ndërsa emocionet më të forta i pati gjatë spektaklit kur takoi të atin e saj, i cili edhe pse nuk kishte qenë dakord që vajza e tij të hynte në shtëpinë popullore, të shtunën në mbrëmje ishte po aq i emocionuar sa e bija e tij. Ermela pohoi se kishte nevojë për atë çmim, pasi ajo lojën e saj e kishte fituar qysh një javë më parë, kur ajo ngeli e vetmja vajzë në shtëpi mes tre djemve. Pak çaste pas përfundimit të spektaklit, Ermela u shpreh se “E dëshiroja me gjithë zemër të ishte fituese një femër, në mos unë dikush tjetër. Kam luftuar sepse asnjë gjë e mirë nuk vjen pa luftuar. Kam luftuar për këtë çmim”. Ndërkaq, ajo ka pohuar se i është trembur Nedës si konkurrente “Mendoj se mënyra sesi i artikulonte, perceptonte situatat mendonte se ishin ato të duhurat. Në momentin që pashë se realiteti nuk kishte asnjë lidhje me teoritë e saj, e hoqa gjithë frikën”. Por Ermela i sfidoi të gjithë, vajza dhe djem, të 26 banorët që hynë në shtëpi dhe për 100 ditë u bënë pjesë e një loje, që në shumë raste e kaloi cakun duke krijuar situata të forta debati dhe konflikti mes banorëve.
Festa
Pjesa më e madhe e ish-banorëve të ‘Big Brother’ kanë qenë prezent të shtunën në mbrëmje në spektakël, për të mbështetur banorët e fundit. Të paktë kanë qenë ata që kanë dashur fitoren e Ogrenit (përveç Nedës në fakt), ndërsa pjesa tjetër ka qenë e ndarë mes Ergysit dhe Ermelës. Sapo ka mbaruar spektakli, të gjithë janë përfshirë në një festë që ka nisur po në skenën e spektaklit dhe që ka vazhduar më tej në një nga pub-et e kryeqytetit, deri në orët e para të mëngjesit. Katër finalistët, mes tyre dhe fituesja e këtij edicioni, kanë qenë të ftuar dje në Fun Club, ku si rrallë herë biseda shkoi e qetë. Siç duket, debatet ish-banorët i kanë lënë për në spektaklin e së shtunës së ardhshme “Post-Big Brother”.