Evakuohet shkolla, gjenden bomba turbulluese

 

LEZHE - Pas alarmit të helmimit të nxënësve të shkollës së Gorres në Laç, për pak është shënuar dje i njëjti precedent në një tjetër shkollë në Lezhë. Shkolla e mesme e Ishull Shëngjinit u evakuua, pasi në ambientet e saj u gjetën katër qese me mbishkrimin kinez, e njëjta që ishte përdorur edhe në shkollën e Gorres. Qeset u gjetën në korridor, por për fat të mirë u evidentuan shpejt pa rrezikuar shëndetin e nxënësve. Drejtuesit e shkollës dhanë alarmin, se katër qese me mbishkrim të madh "Fird end" kanë detyruar të pezullojnë mësimin. Frika dhe paniku i përhapur pak ditë më parë në Laç, ku përfunduan në spital 42 nxënëse të shkollës së mesme Gorre, detyroi drejtorin e shkollës në Lezhë të nxirrte jashtë ambienteve nxënësit dhe stafin e mësuesve. Në vendin e ngjarjes mbërriti policia, e cila po heton në lidhje me autorët, që kanë vënë qeset në ambientet e shkollës. "Drejtori i shkollës bashkë me zëvendësin e tij, me të parë të katër qeset e hedhura dhe të hapura në korridore, kanë urdhëruar që nxënësit të dalin jashtë. Një grup ekspertësh të policisë mbërritën në vend dhe bllokuan qeset. Ato po i nënshtrohen analizave nga ana e policisë shkencore, ndërsa po punohet nëse mund të administrohen në to gjurmë gishtash", bëri të ditur policia e Lezhës. Dritaret dhe dyert e kësaj shkolle janë hapur menjëherë, për të larguar ajrin e ndotur. Burime pranë kësaj shkollë bëjnë të ditur, se mësimi do të rinisë të hënën, pasi nxënësit dje ishin në panik dhe nuk mund të zhvillohej normalisht mësimi.           r.n