Fakti/Bamir Topi, si zëdhënës i Partisë Socialiste, flet për prokurorin

I zënë në befasi nga pjekuria e dekretit të presidentit të republikës, për emërimin e prokurorit të ri të përgjithshëm të republikës, Bamir Topi ka nxituar të kritikojë procesin që prodhoi emrin e Adriatik Llallës, pa u futur në pat-pozicionin që ta kundërshtojë kandidaturën që vetë e ka përkrahur, kur ishte emëruar kryetar i ILDKP-së. “Fryma e Re Demokratike vlerëson se gjykimi i saj për procesin e zëvendësimit të Prokurorit të Përgjithshëm nuk ka ndryshuar nga qëndrimi zyrtar i shprehur dy javë më parë, thotë Bamir Topi me zërin anonim të deklaratës për shtyp. Mbi këtë bazë FRD mirëpret çdo investim adresuar Gjykatës Kushtetuese për të përcaktuar përfundimisht çështjen e mandatit të Prokurorit të Përgjithshëm. Njëherësh Fryma e Re Demokratike vlerëson se, në dallim nga procesi dhe debati kushtetues, mirëpret dhe përshëndet kandidaturën e zotit Adriatik Llalla për Prokuror të Përgjithshëm”. Por klithmat për procesin e përzgjedhjes janë veç paradhoma e qëndrimit refuzues që po gatuhet në zyrat e opozitës. Tashmë Bamir Topi ka thuajse zyrtarisht stofin e zëdhënësit të Edi Ramës dhe si i tillë po përgatit opinionin lidhur me qëndrimin e ri. Topi po synon me çdo kusht të shmanget vëmendja nga shembulli jashtëzakonisht pozitiv që dha presidenti Bujar Nishani që në dekretin e tij të parë të rëndësishëm, duke e bërë spikatës dallimin me dekretet plot kulisa që sillte në parlament Bamir Topi, me njerëz që vinin nga kuzhinat e restoranteve dhe jo nga zyrat profesionale të institucioneve. Duke mbrojtur veten, për shkak të presidencës së tij të korruptuar, Bamir Topi u shfaq dje si zëdhënësi i parë i Partisë Socialiste në betejën krejt të pashpresë të mbajtjes së një qëndrimi refuzues ndaj kandidaturës së prokurorit të ri, për shkak të “procesit”. Amin!