Festivali i Dramës Shqipe në Kosovë rrezikon dështimin

“Vetëm një ditë pas hapjes zyrtare të manifestimit kulturor ‘Flaka e janarit 2009’, nga zyrtarë komunalë të Gjilanit është paralajmëruar mundësia e mosmbajtjes së Festivalit të Dramës Shqipe ‘Talia e Flakës’, që është një ndër katër shtyllat kryesore të këtij manifestimi, i cili bëhet për nder të dëshmorëve të kombit dhe mbahet për të tetëmbëdhjetën herë me radhë”. Kështu shprehet në ueb-sajtin e saj agjencia e lajmeve “Kosovapress”, e cila sqaron më tej se Ministria e Kulturës në Kosovë këtë vit nuk ka dhënë asnjë qindarkë për këtë pjesë të manifestimit, gjë që e kishte bërë vitet paraardhëse. Drejtoresha e re e Teatrit, e cila është përgjegjëse për këtë pjesë të manifestimit të “Flakës...”, ka bërë të ditur se në mungesë të mjeteve dhe për shkak se nuk janë bërë përgatitjet e duhura “Flakës...” së sivjetme do t’i mungojë ky festival. Ndërkaq, ka reaguar edhe ish-drejtori i Teatrit të Gjilanit, Jahi Jahiu, i cili shprehet: “Anulimi i një festivali të tillë është përpjekje për të anuluar një traditë gati 20-vjeçare dhe çfarëdo tentimi për ndonjë traditë të re, do të jetë e gjykuar të dështojë që në fillimin e saj”. Pra shtylla e katërt e manifestimit, që përbëhet nga arti pamor, letrar, muzikor dhe ai dramatik, sipas të gjitha gjasave, nëse nuk do të kemi zhvillime të reja, do të mungojë.

14 Janar 2009