Fillon beteja për Luanin e Artë
Në fund të verës tejet të nxehtë në Itali, Venezia po bëhej gati për pritjen e yjeve filmikë, si Jodie Foster, Madonna, Kate Winslet dhe Al Pacino. Që të gjithë tashmë e kanë konfirmuar ardhjen e tyre në edicionin e 68’të të festivalit Filmik në Venezia, i cili cilësohet si festivali më i vjetër botëror filmik i kategorisë A. Ndërkaq, mbase njëri ndër yjet më të mëdha të aktorëve meshkuj në botën e filmit momentalisht, George Clooney, kësaj radhe vjen në Lido të Venezia’s jo vetëm si aktor por edhe si regjisor.
Fillimisht “The Ides of March”
Filmi më i ri i Clooney “The Ides of March" (Ditët e Marsit) është një triler politik, i cili sigurisht se do të përshtatet për mrekulli në fushatën tashmë të hapur presidenciale në SHBA. Nëpërmjet vepër së tij të katërt si regjisor, Clooney do të konkurrojë për Luanin e Artë bashkë me edhe 23 filma të tjerë. E në mesin e konkurrentëve të tij regjisorialë janë edhe emrat si Roman Polanski, i cili në Venezia e dërgoi filmin e tij “Masakra” (Carnage), sipas të autores franceze Yasmine Reze “God of Carnage”, me Kate Winslet dhe Jodie Foster në rolet kryesore. Regjisori kanadez, David Cronenberg, vjen në Lido me filmin e tij “Metoda e Rrezikshme” (A Dangerous Method), i cili trajton temën e psikanalizës, duke tematizuar ndarjen psikanalistit Sigmund Freud dhe nxënësit të tij, Carl Gustav Jung.
Regjisori amerikan, Steven Soderbergh, do të shfaq jashtë konkurrencës filmin e tij të fundit "Contagion", por edhe filmin e tij tjetër "W.E.", i cili është një rrëfim dashurie ndërmjet mbretit britanik Eduardi i VIII dhe Wallis Simpson. Ky film ishte paralajmëruar të shfaqej në Festivalin e Filmit në Berlin, i cili u mbajt shkurt të këtij viti, por shfaqja e tij u mundësua tek në Venezia. Pjesë e filmit është edhe pop-këngëtarja Madonna. Ndërkaq pjesp e garës në Lido do të jetë edhe adaptimi i Tomas Alfredson i filmit “Tinker, Tailor, Soldier, Spy”, të John le Carre, me Gary Oldman në rolin e super-spiunit George Smiley, si dhe filmi i Al Pacino’s “Wilde Salome”, i cili merret me obsesionin e Pacino’s me shkrimtarin Oscar Wilde, gjegjësisht me veprën e tij kontroverse “Salome”.
Festival i autorëve
Ngjashëm si me filmat, dhe juria e edicionit të këtij viti do të kalojë në shenj të industrisë filmike amerikane. Nëp krye të jurisë sivjet do të jetë regjisori amerikan, Darren Aronofsky, i cili e bëri regjinë e filmit “The Black Swan” (Mjellma e Zezë).
Ndryshe, Festivali Filmik në Venezia jo vetëm që është festivali më i vjetër i këtij lloji në botë, por ai konsiderohet edhe si festival i autorëve. Në Venezia hapat e parë në skenën e filmit botëror i bënë shumë regjisorë që sot konsiderohen ikona të kinematografisë botërore, si Kurosava, Bergmann, Antonioni dhe Visconti. Festivali i Venezia, që njihet edhe si Mostra, krahas Festivalit të Filmit në Cannes dhe atij në Berlin, konsiderohet si festivali i tretë filmik i kategorisë A. Sot, Festivali Filmik në Venezia është pjesë e Bienales artistike, që po ashtu mbahet në të njëjtin qytet italian.