Filmat, reflektim mbi të sotshmen dhe të djeshmen

 

Lakmi që çon në humbje, dashuri të zbërdhylura, realitete të shëmtuara dhe histori që të kthejnë pas në kohë. Dje në Kinema Millennium u shfaqën premierat e katër filmave, dy të animuar e dy me metrazh të shkurtër, prodhime të shtëpisë filmime “Maku production”. Atmosfera u ngroh me dy filmat e animuar, dy abstragime mbi realitetin, “Lakmia”, mbi makutërinë dhe “Një natë”  për humbjen e kuptimit të dashurisë, nën trysninë e konsumimit të përditshëm. Ky i fundit mësohet të jetë pranuar në  konkurrim në një festival që zhvillohet në Belgjikë. Pas një prezantimi të bërë në Shtetet e Bashkuara të Amerikës, “Mira” një film me regji dhe skenar të Dhimitër Ismajlajt u shfaq edhe për publikun shqiptar. Nën lojën e Rozana radit në rolin e Mirës, Ilir Gjinit në rolin e Turit, Neritan Liçajt në rolin e tutorit, etj, u propozua një temë, jo më e re. Një femër, bashkëshortja e një burri të sëmurë, nëna e një fëmije të vogël, detyrohet të prostituojë për të siguruar paratë e operacionit të të shoqit. Ndërsa Eno Milkani me “Shenjtoren” e “huazuar” nga një tregim i Teodor kekos, na kthen pas në vitet ’80. në kohën e luftës së klasave, së pantallonave terital, turneve të natës dhe bar-bufeve, ku në vitrinë rradhiteshin kuleçët 5-lekësh. Në qendër të filmit janë Gjinovefa, interpretuar nga Jonida Vokshi dhe Goni nga Amos Zaharia, dy të rinj, që dashurohen në frontin e punës, në vendin e riedukimit. Ajo sepse mbante një kryq, ai sepse akuzohej sepse kishte grisur portretin e diktatorit. Regjisori nuk i lë asgjë mangut dekorit. Ai e vendos mirë gjithçka në vitet ’80. Që nga veshjet e aktorëve, ambientet përreth, parrullat, mobilimi i shtëpive, gjithçka është pasqyrë e asaj kohe. (Se mund të ndodhë që për shkak të ndonjë makine tip i fundit, apo veshje të modës, të mos marrësh vesh se kur zhvillohen ngjarjet). Loja e sinqertë e aktorëve, deri në naivitet shpesh të bën të vësh buzën në gaz (sidomos të rinjtë që nuk dinë asgjë për vitet e diktaturës), por kohët të tilla ishin atëherë... Të katër filmat janë përfshireë në edicionin e ri të Tirana International Film Festival.