Fiton Tirana, Luftëtari bën shou
Kampionati
Me fitoren e djeshme, Tirana ruan një ritëm kryesuesi edhe pse merr një fitore të vuajtur. I papërmbajtshëm ishte Luftëtari përballë një Teute që zhgënjeu
Bardhebutë mundin 3-0 Shkumbinin, gjirokastritët shkatërrojnë 4-1 Teutën
Altin Manallari
Tirana vuan, por fiton ndaj Shkumbinit dhe mban hapin e kryesuesit, ndërsa Luftëtari shkatërron me një poker Teutën, e cila ka zhgënjyer pritshmëritë në transfertë.
Bardheblutë pa trajner, pas largimit të Hulian Rubios, kanë marrë një fitore me vuajtje 3-0 ndaj Shkumbinit në Selman Stërmasi, duke marrë tri pikë që e mbajnë atë në kryesim me 6 pikë, po aq sa Skënderbeu i vendit të parë, por që ka golavarazh më të mirë. Nën drejtimin e dyshes së përkohshme Tafaj-S.Bulku në stol, nuk i lejojnë vetes të bëjnë hap fals. Starti i ndeshjes ishte thuajse i barabartë për të dy skuadrat, ku u pa një Shkumbin luftarak dhe i organizuar. Ndërsa Tirana nga ana e saj vuan mungesën e një sulmuesi, që të çojë topin në rrjetë, pasi Çota ishte i ulur në stol pas dëmtimit të pësuar në Berat. Sidoqoftë, duhej të vinte minuta e 30-të, që i riu Morina të zhbllokojë rezultatin e sfidës. Pas një goditjeje këndi nga e majta e sulmit bardheblu, sulmuesi i ri shfrytëzon lëmshin e krijuar mes lojtarëve në zonën e vogël të Kotorrit dhe e shtyn topin në rrjetë. Në minutën e 40-të, peqinasit kërcënojnë me një goditje dënimi. Pjesa e parë u mbyll 1-0 për kryeqytetasit, ndërsa në të dytën hyn në fushë edhe Çota. Dyshja e sulmit të peqinasve R.Dervishi-Mustafaj tregohet e pasaktë, duke i mbyllur pa rezultat aksionet e shumta të skuadrës së tyre. Me kalimin e minutave, në fundin e sfidës, Çota dhe Morina realizojnë edhe dy gola të shpejtë, të cilët vulosin fitoren 3-0. Fitorja e dytë brenda dy javësh kampionat për Tiranën, ndërsa Shkumbini është i detyruar të përjetojë fundin e ftohtë të renditjes, pa shënuar dot asnjë gol dhe marrë asnjë pikë. Ndërkohë që Luftëtari ka korrur një poker në ndeshjen e parë para tifozëve të saj, në ndeshje si debutuese në Superiore pas 5 vitesh në Kategorinë e Parë. Bluezinjtë e drejtuar nga Nevil Dede shkatërrojnë 4-1 durrsakët e Hasan Likës, të cilët ishin treguar të suksesshëm në transfertën e javës së shkuar, në Peqin, por kanë përjetuar 90 minuta ankthi në Gjirokastër, aty ku janë dorëzuar pa kushte, sepse zotër të gjithçkaje kanë qenë vendësit. Skuadra gjirokastrite është treguar e papërmbajtshme në fushën e vet. Pas vetëm 30 minutash lojë kryesonte me meritë me rezultatin 2-0, falë golave të Nikoliç (21) dhe Licaj (28). Por pjesa e parë u mbyll me rezultatin 2-1 pas golit të Mançakut që krijoi iluzionin se durrsakët do të rivalizonin deri në fund. Pjesa e dytë ka folur për Luftëtarin, i cili gjeti edhe dy herë rrugën e rrjetës me Rraboshta (51) dhe Shenaj (66), duke i dhënë formë kështu një fitoreje bindëse, e cila tregon se gjirokastritët në këtë sezon nuk kanë ndërmend të kthehen sërish në kategorinë inferiore. Ndërsa konsiderohet një humbje zhgënjyese kjo e Teutës, e cila tashmë duket se është kthyer me këmbë në tokë pas fitores në transfertën e javës së shkuar në Peqin. Java e dytë e Superiores mbyllet sot me ndeshjen Besa-Tomori.
Superiore (Java II)
TË PREMTEN
Skënderbeu-Apolonia 2-0
Plaku 57 (11-m), Orelesi 64
Flamurtari-Laçi 0-1
Emurllai 51
TË SHTUNËN
Kukësi-Vllaznia 0-0
Kastrioti-Bylis 2-1
Sekseni 40, Gocaj 52 / Mohamed 59
DJE
Tirana-Shkumbini 3-0
Morina 30, 90, Cota89
Luftëtari-Teuta 4-1
Nikoliç 21, Liçaj 28, Rraboshta 51, Shenaj 66 / Mancaku 36 (11-m)
SOT
19:00 Besa-Tomori
Klasifikimi
Skuadra N P
1. Skënderbeu 2 6
2. Tirana 2 8
3. Luftëtari 2 4
4. Kastrioti 2 4
5. Laçi 2 4
6. Teuta 2 3
7. Kukësi 2 2
8. Besa 1 1
9. Bylisi 2 1
10. Flamurtari 2 1
11. Apolonia 2 1
12. Vllaznia 2 1
13. Shkumbini 2 0
14. Tomori 1 0
Fiton Tirana, Luftëtari bën shou burimi: Gazeta S H Q I P Gazeta Shqip