Fundjava, ankthi i emigrantëve

 

KORÇE - Radhë emigrantësh në hyrje të doganës greke nga toka shqiptare, por edhe nga thellësia e tokës helene. Shkak, puna me ritme të ngadalshme dhe vetëm me dy sportele nga dogana e vendit fqinj. Deri në orët e pasdites së djeshme, gjendja ishte e rënduar, duke rrezikuar që të vazhdonte e tillë dhe në mbrëmje. Në territorin shqiptar radha u krijua në orët e mesditës për shkak të mbërritjes së një fluksi emigrantësh, që pas pushimeve në vendin tonë kërkonin të ktheheshin në Greqi ku jetojnë e punojnë prej vitesh. Këtij fluksi në vend që dogana greke t’i përgjigjej me ritme të shpejta pune e ngadalësoi atë. Me dy sportele nuk u arrit funksionimi normal i procedurave. Sipas policisë sonë, pala greke po vepron kundër marrëveshjes se gjatë sezonit do të punojë me kapacitet të plotë. E njëjta gjendje është krijuar dhe në kthim, pasi qindra shqiptarë kanë kaluar pushimet tek të afërmit në Greqi apo në zona turistike të shtetit fqinj.   j.gj