Gaqo për “Gines”, ndryshon tri parti në tre vjet dhe në fund ngec te Berisha
Duket se çuditë dhe surprizat në skenën politike shqiptare nuk kanë të sosur. Çudia e radhës kësaj here mban emrin e Gaqo Apostolit dhe partisë së krijuar prej tij, të quajtur Aleanca për Demokraci dhe Solidaritet. I pozicionuar për 18 vjet me radhë kundër Sali Berishës, madje i dhunuar edhe fizikisht në zgjedhjet e manipuluara të vitit 1996 nga njerëzit e ish-presidentit dhe kryeministrit të sotëm, Gaqo Apostoli, kryetari i ADS-së, ka vendosur që në zgjedhjet parlamentare të 28 qershorit 2009 të marrë pjesë në koalicionin e Partisë Demokratike, të udhëhequr nga ish-kundërshtari i tij politik, Sali Berisha. Një vendim i tillë është zbuluar dje, kur të gjithë gazetarët kanë mbetur të çuditur teksa kanë parë emrin e Gaqo Apostolit dhe partisë së tij ADS të regjistruar në listën zyrtare të koalicionit “Aleanca për ndryshim”. Pasi u shkëput tre vjet më parë së bashku me 300 anëtarë nga PSD-ja e Skënder Gjinushit për t’u bashkuar me LSI-në e Ilir Metës dhe pasi u largua i vetëm në mars të 2009-s nga LSI-ja, Apostoli krijoi një parti të re të quajtur Aleanca për Demokraci dhe Solidaritet. Ish-ministri i Transporteve në qeverinë socialiste shpresoi më kot që ai dhe partia e tij të kandidonte në zgjedhjet e 28 qershorit përkrah koalicionit “Bashkimi për ndryshim”, të udhëhequr nga Partia Socialiste.
Për ditë me radhë ai qëndroi në ambientet e bar “Austria”-s pranë selisë rozë, në pritje të ndonjë kontakti me kryesocialistin Edi Rama. Por ky i fundit i ka shmangur takimet me Apostolin, kjo edhe për shkak të “presionit hakmarrës” të Gjinushit, duke i lënë të nënkuptohej se nuk bënte pjesë në projektin e tij.
Në këto kushte Apostoli ka vendosur t’i luajë të gjitha. Edhe me të pamundurën. Pikërisht duke vendosur që të bashkohet me Sali Berishën dhe koalicionin e tij. Për t’u theksuar është fakti se pak ditë më parë ai u dërgonte një letër drejtuesve të partive të dy koalicioneve të majta, ku u kërkonte bashkimin në një koalicion të vetëm, pasi sipas tij kjo ishte e vetmja mënyrë për të larguar Sali Berishën nga pushteti. Por duke parë se liderët e së majtës nuk pranuan të bashkoheshin, atëherë Gaqo Apostoli vendosi të shkojë vetë tek Berisha. Ai e ka marrë këtë vendim
duke e konsideruar karrierën e tij politike, ashtu edhe si dy këngët e tij të preferuara që kemi parë t’i këndojë shpesh: Fillimin si kënga “Për ty atdhe” dhe vazhdimin e karrierës si “Let it be”, që në shqip përkthehet (Varja).
16 Maj 2009