Gara për Tiranën, përplasjet PS-PD

 

Aristir Lumezi / Adi Shkëmbi

Kandidatët e Tiranës janë tashmë në kulmin e fushatës të ndarë në dy blloqe. Dy partitë e mëdha, PS-PD kanë përqendruar të gjitha forcat e tyre në kryeqytet, ku janë munduar të bëjnë një ndarje sa më ballafaquese ndaj kundërshtarit. Ata kanë caktuar kandidatët në njësitë bashkiake, por dhe komunat dhe bashkitë e këtij qarku, duke e kthyer betejën edhe një lloj maxhoritari më të madh, pasi kanë përballë jo vetëm partitë por dhe kandidatët konkretë. Ndarja që dy partitë i kanë bërë listave të tyre, na jep përplasje interesante, pothuaj në të gjitha njësitë vendore. Ndryshe nga ç’premtonte në vetvete sistemi proporcional rajonal, zgjedhësit kanë tashmë numrat e kandidatëve të zonave të tyre me të cilët komunikojnë për hallet dhe shqetësimet. Sistemi premtonte se elektorati do të vendoste mes listës së partive dhe jo individëve, duke e ndarë atë nga sistemi maxhoritar një emëror. Në këto komunikime, nuk mungojnë dhe premtimet individuale, përveç atyre që hedhin kryetarët e partive në turet e tyre në zonat konkrete. 
Përplasja
Nëse do të marrim me radhë njësitë bashkiake të Tiranës, ka përballje interesante mes kandidatëve që gjatë fushatës janë të ngarkuar të bindin sa më shumë mbështetës për alternativën e tyre. Në njësitë bashkiake nr.1, 3, 4, Partia Demokratike kandidon me emra të njohur dhe me pushtet si zv/ministri i Financave Florjon Mima, drejtori i KESH-it, Gjergj Bojaxhi, por dhe emra të tillë si Ilir Rusmajli dhe Tritan Shehu e drejtori i Hipotekës, Arben Qirjako. Socialistët nga ana e tyre i përgjigjen listës së PD-së me ish-ministrin e Mbrojtjes dhe të Rendit, Ilir Gjoni dhe anëtarët e Asamblesë Kombëtare Shpëtim Çami, Bledar Doracaj dhe regjisorin Ilirian Mihali. Në njësitë bashkiake 2,7,10, demokratët kanë caktuar deputeten aktuale Lajla Përnaska, Arben Imamin dhe kryetarin aktual të Njësisë bashkiake 10, Gerti Bogdani. Ndërsa socialistët nga ana e tyre, i përgjigjen kësaj përfaqësie me kreun e listës së tyre për Tiranën, Vasilika Hysin, Besnik Barajn, Enkelejda Shkrelin, Sokol Krajën, Artan Lamen dhe Fatmir Xhafajn. Njësia bashkiake nr.10 është një nga njësitë që socialistët humbën në zgjedhjet vendore të 2007, prandaj duket se kësaj sfide ata i kanë vënë kreun e listës së tyre, por dhe një nga figurat kryesore të PS-së, ish-ministrin e Drejtësisë Fatmir Xhafajn. Edhe në njësitë bashkiake të Tiranës 5 dhe 6 gara premton matje reale forcash. Demokratët kanë vendosur ministrin e Brendshëm, Bujar Nishanin, por dhe ministrin e ri të Punës, Viktor Gumi, zv.ministrin Taulant Bimo dhe Ferdinand Shehun. Socialistët i përgjigjen me dy kandidatura të konsoliduara, ish-ministrin e Jashtëm dhe njeriun e reformave të fundit, Kastriot Islami dhe Sajmir Tahirin, ideatorin e ‘Vullnetarëve’, por dhe të Fondacionit ‘Qemal Stafa’, të cilin e drejton. Grupi socialist vazhdon me Abdyl Sarjen dhe Diana Ndrenikën. Interesante duket gara dhe në njësitë vendore 8 dhe 9 në Tiranë. Demokratët përballen me kryetarin e ri të PD-së Tiranë në zonën e tiranasve të vjetër, Aldo Bumçi, por dhe me ministren e Integrimit Majlinda Bregu dhe sportistin e njohur të Tiranës, Indrit Fortuzi. Socialistët sfidojnë me nënkryetarin e bashkisë Tiranë, Eduart Shalsi, njeriun më aktiv në këtë institucion, por dhe me aktivisten e njohur Elisa Spiropali. Njësia 11 do të jetë sfida e socialistëve për t’ia marrë PD-së. Socialistët përfaqësohen këtu me Namik Doklen dhe Naim Asllanin, të cilët i njohin mirë komunitetet e zonës. Ndërsa PD me Aldo Bumçin dhe zv/ministrin e Punës, Kastriot Sulko.

Platforma

                    PD                PS

Njësia 1        Florjon Mima            Ilir Gjoni
            Gjergj Bojaxhi            Shpëtim Çami
                           

Njësia 2        Lajla Përnaska            Vasilika Hysi
                            Besnik Baraj
                            Enkelejda Shkreli
                            Artan Lame
                            Fatmir Xhafaj

Njësia 3        Tritan Shehu            Ilir Gjoni
                            Shpëtim Çami
                           
Njësia 4        Ilir Rusmali            Ilir Gjoni
            Arben Qirjako            Shpëtim Çami
                            Bledar Doracaj
                           
Njësia 5        Viktor Gumi            Kastriot Islami
            Taulant Bino            Sajmir Tahiri
                       
Njësia 6        Bujar Nishani            Sajmir Tahiri
                            Abdyl Sarja
                            Diana Ndrenika

Njësia 7        Arben Imami            Vasilika Hysi
                            Besnik Baraj
                            Enkelejda Shkreli
                            Sokol Kraja
                            Artan Lame
                            Fatmir Xhafaj

Njësia 8        Aldo Bumçi                 Eduart Shalësi
                            Gerta Lubonja
                            Bledar Çuçi
                            Elisa Spiropali

Njësia 9        Majlinda Bregu            Eduart Shalësi
            Indrit Fortuzi            Gerta Lubonja
                            Bledar Çuçi
                            Elisa Spiropali

Njësia 10        Gert Bogdani            Vasilika Hysi
                            Besnik Baraj
                            Enkelejda Shkreli
                            Sokol Kraja
                            Artan Lame
                            Fatmir Xhafaj

Njësia 11        Aldo Bumçi            Namik Dokle
            Kastriot Sulko            Naim Asllani

Vorë            Bujar Nishani            Auron Tare
                            Artan Gaçi

Dajt            Gent Strazimiri            Xhemal Qefalia
                            Mehmet Hasalami

Paskuqan        Myqerem Tafaj            Xhemal Qefalia
                            Mehmet Hasalami

Rrogozhinë        Luan Skuqi            Dashamir Peza
                            Andis Harasani

Kavajë            Galip Ramadhi            Dashamir Peza
            Arta Sakja            Andis Harasani