Gara për shefat në QSUT, rikandidojnë të vjetrit
Gara për shefat e rinj të shërbimeve në Qendrën Spitalore Universitare “Nënë Tereza”, që do të drejtojnë edhe departamentet e Fakultetit të Mjekësisë, është shndërruar thjesht në një proces që duhet të kryhet në zbatim të Ligjit të ri të Arsimit të Lartë, brenda të cilit vetëm konkurrencë nuk ka. Ditën e djeshme, rektori i Universitetit të Tiranës, Dhori Kule, ka shpallur kandidatët që kanë aplikuar për përgjegjës shërbimesh në Fakultetin e Mjekësisë, ku 85 mjekë të njohur të QSUT-së, që janë edhe shefat e shërbimeve të këtij spitali, kërkojnë të mbajnë përsëri vendet e tyre të punës. Pas mbylljes së fazës së aplikimeve, rektori i Universitetit të Tiranës, Dhori Kule ka bërë të ditur se për 35 shërbime është paraqitur vetëm nga një kandidaturë, por kjo nuk do të thotë, sipas tij, se ata shpallen automatikisht fitues. Në fakt, kjo është një çështje që mbetet për t’u parë, pasi shumica e aplikantëve për shefa shërbimesh në QSUT rezulton se janë aktualisht në pozicione drejtuese në pavijonet e këtij spitali, ndërkohë që në këtë konkurrim një pjesë e konsiderueshme e tyre nuk kanë rivalë. “Konkurrenca është e tillë që në tre shërbime ka konkurrencë me tre kandidatë, në 19 shërbime konkurrencë me dy kandidatë dhe 35 shërbime kanë vetëm nga 1 kandidat. Ka një pjesë të madhe shërbimesh dhe ky është një problem që ka nga një kandidat të vetëm. Kjo nuk do të thotë në opinionin tim që automatikisht do të përcillen dhe miratohen ata në të ardhmen. Gjatë kohës ne do të shohim edhe formatimin aktual të shërbimeve. Mund të lindë nevoja për të riorganizuar shërbime të veçanta dhe për të bërë një ristrukturim të shërbimeve të caktuara, në varësi të situatës”, - deklaroi rektori Kule. Për herë të parë shefat e shërbimeve do të drejtojnë dhe departamentet e Fakultetit të Mjekësisë. Aktualisht aplikantët konkurrojnë për 57 shërbime, ndërkohë që ditën e hënë do të nisë edhe shqyrtimi i dosjeve. Pas sqarimit të aplikimeve për shefat e shërbimeve në QSUT, rektori i Universitetit të Tiranës nuk ka lënë pa përmendur edhe çështjen e shkarkimit të dekanit të Fakultetit të Mjekësisë, Alfred Priftanji, për të cilin ministri i Arsimit, Myqerem Tafaj, nuk ka marrë asnjë vendim. Sipas rektorit Dhori Kule, ministri i Arsimit ka tejkaluar të gjitha hapësirat ligjore, për kërkesën e rektoratit për shkarkimin e dekanit të Fakultetit të Mjekësisë. Gjithashtu, ai ka theksuar se në kërkesën e tij drejtuar ministrit Tafaj, për shkarkimin e dekanit janë, evidentuar të gjitha shkeljet e tij ligjore që nuk lidhen vetëm me çështjen e specializimeve.
Lista
Shërbimi i Hematologjisë
Arian Pushi
Pal Xhumari
Shërbimi i Gastrohepatologjisë
Adriana Babameto
Jovan Basho
Shërbimi i Hipertonisë dhe Mjekësisë Interne
Mihal Tase
Shërbimi i Nefrologjisë
Nestor Thereska
Shërbimi i Endokrinologjisë
Agron Ylli
Florian Toti
Shërbimi i Alergologjisë
Alfred Priftanji
Shërbimi i Reumatologjisë
Argjend Tafaj
Teuta Baçka-Çiço
Shërbimi i Sëmundjeve Pulmonare
Pneumologji 1
Perlat Kapisyzi
Pneumologji 2
Silvana Bala
Pneumologji 3
Hasan Hafizi
Shërbimi i Biokimisë
Ndok Marku
Anila Bulo
Teuta Dedej-Kurti
Shërbimi i Imunologjisë
Genc Sulçebe
Xheladin Çeka
Shërbimi i Mikrobiologjisë
Betim Byku
Andi Koraqi
Genatian Kasmi
Shërbimi i Semiologjisë Imazherike
Martina Veveçka–Heba
Shërbimi i Kardiologjisë Nr.1
Artan Goda
Shërbimi i Kardiologjisë Nr. 2
Petrit Bara
Spiro Qirko
Alban Dibra
Shërbimi i Mjekimit Intensiv
Idriz Balla
Sokol Myftiu
Shërbimi i Kirurgjisë Kardiake
Ali Refatllari
Edvin Prifti
Shërbimi i Sëmundjeve Vazale
Edmond Kapedani
Sokol Xhepa
Shërbimi i Sëmundjeve Infektive
Dhimitër Kraja
Shërbimi i Sëmundjeve të Lëkurës
Ermira Vasili
Shërbimi i Sëmundjeve Profesionale
Skënder Skënderaj
Niko Peçani
Shërbimi i Kirurgjisë së Përgjithshme
Nikollaq Kaçani
Shërbimi i Kirurgjisë Nr.1
Edmond Çeliku
Shërbimi i Djegie-Plastikës
Gjergji Belba
Shërbimi i Onkologjisë
Agim Sollaku
Shërbimi i Urologjisë
Mustafa Xhani
Shërbimi i Ortopedisë-Traumatologjisë
Eduard Gjika
Gjergji Çaushi
Shërbimi i ORL
Pjerin Radovani
Agron Strazimiri
Shërbimi i Okulistikës
Pajtim Lutaj
Ali Tonuzi
Vilma Mema
Shërbimi i Kirurgjisë Maksiofaciale
Ramazan Isufi
Shërbimi i Pediatrisë së Përgjithshme
Durim Bebeci
Shërbimi i Sëmundjeve Ngjitëse
Eli Foto
Shërbimi i Pediatrisë Speciale Nr.1
Evda Veveçka
Luljeta Serbo-Kota
Shërbimi i Pediatrisë Speciale Nr. 2
Paskal Cullufi
Shërbimi i Nefropediatrisë
Rezar Xhepa
Shërbimi i Terapisë Intensive
Sashenka Sallabanda
Shërbimi i Kirurgjisë Pediatrike
Hysen Heta
Shërbimi i Onko-Hematologjisë
Anila Godo
Shërbimi i Gjenetikës
Vahe Mokin
Shërbimi i Neurokirurgjisë
Mentor Petrela
Shërbimi i Neurologjisë
Jera Kruja
Shërbimi i Psikiatrisë
Ariel Çomo
Shërbimi i Obstetrikës Nr.1
Halim Kosova
Maksim Gjoni
Shërbimi i Gjinekologjisë Nr.1
Nikita Manoku
Avenir Balili
Shërbimi i Patologjisë së Hershme dhe të Vonshme Nr.1
Afërdita Manaj
Shërbimi i Obstetrikës Nr. 2
Astrit Bimbashi
Shërbimi i Gjinekologjisë Nr. 2
Orion Gliozheni
Shërbimi i Patologjisë së Hershme dhe të Vonshme
Rubena Moisiu
Shërbimi i Anatomisë Patologjike
Mehdi Alimehmeti
Shërbimi i Mjekësisë Ligjore
Bardhyl Çipi
Sokrat Meksi
Shërbimi i Statistikës
Genc Burazeri
Elizana Petrela
Shërbimi i Terapisë Stomatologjike
Diana Brovina
Lindita Rusi
Shërbimi i Ortopedisë Stomatologjike
Ruzhdie Qafmolla
Shërbimi i Anestezi-Reanimacion
Aleksandër Hoxha
Ilir Ohri
Shërbimi i Urgjencës Mjekësore
Edmond Zaimi
Shërbimi i Toksikologjisë
Zihni Sulaj
Mjekët e rinj në protestë, 3 muaj pa rroga
Mjekët e rinj të QSUT kanë dalë në protestë, pasi nuk kanë marrë pagesën nga muaji prill deri në qershor. Protesta e 133 mjekëve të rinj për rrogat, që është zhvilluar dje pranë Fakultetit të Mjekësisë, ka pasur dhe arsye të tjera, pasi njëherësh pjesa më e madhe e këtyre mjekëve ndjekin specializimin në QSUT dhe u është rritur tarifa e regjistrimit. Përfaqësuesi i kësaj proteste, Arjan Vyshka, thotë se nga 60 mijë lekë që paguan fillimisht, tani ajo është rritur me 40 mijë të tjera, kështu që u duhet të paguajnë një tarifë prej 100 mijë lekësh. “Pasi kemi kryer pagesën vjetore prej 600 mijë lekësh të vjetra pranë fakultetit, që jepet për arsyen e mësimdhënies që ne do të marrim gjatë viteve, është ndryshuar me një VKM tjetër ky vendim, dhe pagesa është shtuar nga 600 në 1 milionë lekë të vjetra. Kërkojmë të fillojnë marrëdhëniet financiare të specializimit që në datën 1 prill, kur ne jemi paraqitur sipas një kërkese të dekanit”, - tha Vyshka. Mjekët bëjnë të ditur se kërkesat e tyre i kanë dërguar para më shumë se dy muajsh jo vetëm pranë Ministrisë së Arsimit, por dhe në Kryeministri. Ata sqarojnë se nga këto institucione nuk kanë marrë asnjë përgjigje dhe për pasojë kanë menduar të mos i ndalin protestat.