Gati protestat për energjinë

• GJIROKASTER - Partia Socialiste e Gjirokastrës do të nisë protestat në qytet për shkak të krizës energjetike.Sipas kreut socialist, Florjan Hysi, mungesa e pajustifikueshme e energjisë elektrike në çdo orë të ditës për qytetarët gjirokastritë është e patolerueshme dhe kjo është një pikë ku i duhet të kërkohet me forcë qeverisë të ndërhyjë për përmirësimin e situatës. "Qytetarët gjirokastritë rezultojnë konsumues të rregullt të energjisë elektrike dhe kësisoj dhe faturues në masën më të lartë të saj. Kjo e detyron qeverinë Berisha të shikojë me përparësi këtë çështje, e cila po bëhet e padurueshm". Hysi ka marrë në mbrojtje edhe zërat e biznesmenëve gjirokastritë për mungesën e energjisë elektrike, çka ka sjellë një dëm ekonomik tek ta. "Ngritja e çmimit të energjisë elektrike, të karburanteve është një tregues i rëndimit të situatës ekonomike në jugun e vendit. I kërkojmë qeverisë Berisha të ndërhyjë urgjentisht në përmirësimin e kësaj situate, e cila në radhë të parë rëndon te konsumatori i thjeshtë e më pas te prodhuesit, të cilët detyrohen të operojnë me çmimet e larta të produkteve". Brenda vitit, Hysi ka sinjalizuar daljen në rrugë të militantëve të majtë për të protestuar ndaj mungesës së energjisë elektrike dhe rritjes së kostos së jetesës.                     p.n